[A:164a]ting nge 'dzin gyi sgo bsam gyis mi khyab pa la mnga' 'byor pas/ dbus kyi phyogs su srod cig dge bshes 'dra dang chos kyi gsung gleng mdzad pa'i don rnams tshigs bcad du mdzad pa de yang snyel dogs nas mun nag la phyag bris su bkod pas/ drung na mi nyag sher rgyal yod pa des chos rje la/ drung pa phyag yig byang drags pas rgyus thog gi yong ba lags sam zhus pas/ rje'i zhal nas 'am bu la 'od gsal zla ba shar ba'i snang ba tsam pa cig rgyun du yod pas bris pa yin zhes gsungs te/ sang bltas pa na nyin par bris pa dang khyad par mi 'dug pas/ shin tu yid ches dad pa chen po skyes par gyur ces grags la/ mngon par shes pa yang thogs med du mnga' bas gang ltar lung bstan pa rnams kyang de kho na ltar 'byung ste chos rdzong pa'i dge bshes shig gong dkar du 'gro dus phyag dbang dang sku khams zhus pas/ khyed rang phyin pas legs po 'ong / song dang lhag pa'i lha dang mjal bar 'dug gi zhes gsungs te/ dge bshes des kyang rim gyis phyin te g.yas ru la 'gro ba'i tshe/ ko ba'i nang du yi dam dran par byas gsol ba btab pas/ srin po ri'i ngos kyi nam mkha' la 'khor lo bde mchog zhal mthong ste ting nge 'dzin dang rtogs pa bsam gyis mi khyab pa skyes pas/ chos rje nyid la rdo rje 'chang dngos kyi mos gus skyes zhes grags shing / yang chos rdzong du dbang bskur ba cig gi tshe/ dbang rdzas rdo rje dang dril bu rim pas gtad pa na/ bla ma legs pa bya ba phal pa gcig yod pa de'i thad du phebs pa na/ chos rje rang gi phyag dril khyer shog