[A:158b]tshig don la blo kha phyogs tsam byung ba 'di de nyid kyi bka' drin yin zhes kyang gsungs shing / spyir yang bla ma rnams kyi nang nas lo tsA ba 'di nyid la mi phyed pa'i dad pa mnga' ste/ 'bel gtam mdzad pa'i gnas skabs kun tu bla ma 'di nyid kyis dang por slob gnyer la dka' spyad mdzad tshul/ las rgyu 'bras la shin tu 'dzem pa mdzad pa'i rgyu mtshan dang / gsung bgros gnang ba kun kyang khyad par du che tshul sogs mkhas btsun bzang gsum gyi yon tan rnams dges tshor dang bcas kun la gsungs pa dang / bdag nyid chen po rang la bka' drin lhag par che ba'i bla ma lnga yod pa'i gcig lo tsA ba chen po 'di yin zhes kyang grags la/ gang ltar bdag nyid chen po 'dis lo tsA ba chen po 'di nyid kyi drung du mdo sngags kyi chos tshul rgya mtsho lta bu zhig gsan cing thugs su chud par mdzad mod kyang / rje btsun sa skya pa chen po la dam chos sgo skyel gyi tshul du rje btsun rnal 'byor gyi dbang phyug nyid byon nas legs par stsal ba'i gsung ngag rin po che lam 'bras bu dang bcas pa'i gdams ngag ni/ dpal sa skya pa'i chos lugs sangs rgyas nas da lta'i bar du snyan brgyud bzhi'i gdams pa bar ma chad pa'i byin rlabs kyi brgyud pa dang / gdams pa dang ldan pas bskyed pa'i rim pa la brtan pa thob cing / rdzogs rim gyi ting nge 'dzin mang po thugs rgyud la 'khrungs pas tshe 'di nyid la grub pa brnyes pa'i rdo rje 'dzin pa chen po/ mkhas grub kyi skyes bu dam pa rnams kyi gtsug gi rgyan du gyur pa rgyal ba brag phug pa chen po bsod nams dpal ba'i drung du gsan pa yin te/ 'di'i drung du thog