[A:16a]gshed dgra nag po'i rgyud gsum/ dpal 'dzin gyi 'grel pa yan lag dang bcas pa rnams dang / dpal rdo rje gdan bzhi'i 'grel pa yan lag dang bcas pa dang / sangs rgyas mnyam sbyor gyi 'grel pa yan lag dang bcas pa rnams dang / sgrub thabs brgya rtsa dang / man ngag phra mo brjod kyis mi long ba gsan zhing khong du chud par mdzad do/ /de ltar bla ma ba ri bas gdan sa lo brgyad bzung zhing / de'i bar la rgya gar gyi gnas byin rlabs can du ma'i sa dang / byang chub kyi shing dang / de bzhin gshegs pa dang / paN grub du ma'i ring bsrel dang gdung / khyad par du sangs rgyas 'od srung gi snam sbyar bzhugs pa'i rnam rgyal mchod rten/ bstan pa'i gzhi rten du 'gyur pa'i rten 'brel du ma dang bcas pa bzhengs te/ rnam rgyal gyi gzungs 'bum ther gsum dang khri tsho bdun bzhugs shing / rab gnas kyi don du'ang rnam rgyal gyi cho ga stong phrag gnyis mdzad pa'i tshes brgyad kyi nyin me tog gtor ba na/ mchod rten gyi bum pa las 'phros pa'i 'od ser po/ la la la gser btso ma'i 'od 'khyud pas mig gis mthong tshad kyi sa gzhi dang nam mkha' khengs shing dril bu'i sgra lta bu 'khrol ba dang / legs so bya ba'i sgra mi che ba lan bzhi kun gyis mthong thos su gyur pas thams cad ya mtshan du gyur/ de nas bzung ste phyogs dus kun du bkra shis pa'i ltas bsam gyis mi khyab pa byung ba yin no zhes slob dpon bsod nams rtse mo'i gsung rab ba ri ba'i rnam thar las bshad do/ /gzhan yang mgon po'i bka' babs bzhi'i nang tshan gyi sku'i