[A:147b]du ma gsan pa dang / khyad par bstan pa la zhugs la yongs su rdzogs pa dge slong gi dngos po'am bsnyen par rdzogs pa'i sdom pas thugs rgyud phyug par bya ba'i phyir/ dgung lo nyer bzhi pa chu pho khyi'i lo bod du byon te/ lam bar rnams su yang gdul bya dpag tu med pa smin par mdzad cing / de tshe nyid kyi phyag tu longs spyod kyi dngos po bsam gyis mi khyab pa byung ba thams cad kyang / bde bar gshegs pa'i bka' 'gyur mtshal gser las bzhengs pa dang / rgya gar gyi mkhas grub bsam gyis mi khyab pa byon pa rnams kyis bstan bcos ji snyed bod du 'gyur ba kun bzhengs pa dang / gzhan yang bla ma gong ma rnams kyi dus mchod/ zhal bzhugs pa'i bla ma rnams la 'bul ba/ dge 'dun gyi bsnyen bkur/ skye bo dbul phongs du ma la sbyin gtong la sogs pa gzhan gyi ched 'ba' zhig mdzad ces bshad la/ khyad par gdan sa chen por phebs nas bstan 'dzin gyi skyes bu du ma la 'bul ba/ dge 'dun khri phrag du ma la gser zho re'i 'bul 'gyed la sogs pa zang zing gi sbyin pa rgya chen po mdzad cing / chos kyi sbyin pa yang skye bo khri phrag du mar longs pa la theg pa chen po'i sems bskyed kyi cho ga mdzad de/ thams cad la rdzogs pa'i sangs rgyas kyi sa bon btab ste gzhan gyi don yang rlabs po che bsgrubs/ bdag nyid kyang bsnyen par rdzogs pa mdzad pa dang / gzhan yang mkhyen rab kyi dbang phyug dpal ldan seng ges gtso mdzad/ dge ba'i bshes gnyen du ma la dbang / rgyud/ man ngag byin rlabs la sogs pa gsang sngags zab mo'i chos kyi sgo du ma dang / mdo dang