[A:136b]grags so/ /de dag la 'di skad ces bya ste/ sngon tshe sprul pa'i lo tsA dpal brtsegs bsrung / /phyi rabs rgyal sras sa ston rir grags pa/ /'dzam gling byang phyogs skyong phyir slar byon pa'i/ /dpal ldan 'phags pa'i mtshan khyod bsngags par 'os/ /'khrungs ma thag nas ngo mtshar rnam thar gyi/ /skyes mchog 'phags pa zhes su kun la grags/ /rtsod bral mkhas grub du ma'i chos kyi mdzod/ /ma lus kun gyi bdag po ma lags sam/ /mtha' yas 'gro ba'i don mang mdzad pa'i phyir/ /kun gyis mchod 'os sa skya'i gdung rigs su/ /bsams bzhin skye ba bzhes pa'i sprul pa'i sku/ /'phags pa'i mtshan gang don la gnas gyur pa/ /'gro ba 'dren mdzad khyod la 'gran nus pa/ /'ga' zhig yod na la la ston par rigs/ /kha cig chos kyi 'byor pas phyug gyur kyang / /srid pa'i 'byor pas rang srog 'tsho ba tsam/ /sa skyong rgyal po srid la dbang 'byor yang / /chos kyi dbang phyug nyin mo'i skar ma tsam/ /srid pa'i 'byor pa 'khor los sgyur rgyal dang / /chos kyi 'byor pa zas gtsang sras lta bu/ /gang zag gcig la ngo mtshar rmad byung chos/ /ma lus rdzogs par mnga' ba khyod lta bu/ /sngon chad ma byung phyis kyang mi 'byung bar/ /mngon sum grub phyir snying nas dad pas 'dud/ /khyod kyi drin las dpal ldan sa skya pa'i/ /'phrin las rgya mtsho'i gos can khyab pa nas/ /bzung ste sa skya'i 'bangs su ma gyur pa'i/ /dbus gtsang khams 'dir skye bo su yod smros/ /zhes kyang shugs 'byung du smras so/ /
de lta bu'i bla ma chen po 'phags pa dang yum gcig pa'i