[A:92a]lo/ /de dus chos rgyal 'phags pas bka' gnang nas/ bande'i khang par gser yig pas 'tsher mi 'bab pa dang / 'u lag mi bskul ba dang / khral mi 'ded pa rnams ji ltar dgongs pa la bzhed pa ltar rgyal pos zhal gyis bzhes shing / gzhan yang rgyal po'i lung gis/ nyi ma nub kyi bande rnams ji ltar bya ba'i mgo lung sa skya pa shes su chug bya ba'i lung gnang zhing / yang rgyal po'i gsung gis bod thams cad la sa skya pa'i chos lugs las gzhan byed dbang med pa'i lung 'bud gsungs pa la/ chos rgyal 'phags pas rang rang gi chos lugs gang yong skyong du 'jug pa cis kyang dgos gsungs nas/ yon mchod gnyis ka'i 'ja' sa thams cad la rang rang gi chos lugs la 'bad pa thon gsungs pa sha stag yod pas/ de ltar na mchod yon gnyis ka dbang spus bzang zhing thugs rje shin tu che ba yin la/ de ltar chos kyi rgyal po 'phags pa rin po ches gzhal du med pa'i bka' drin gyis 'dzam bu'i gling byang phyogs 'di nyid rdzogs ldan gyi bde ba la 'god par mdzad pa'i bka' drin shes pa'i ched du hor gyis phul ba'i 'ja' sa mu tig ma dang / bande shed bskyed ma'am/ 'ja' sa bod yig mar grags pa gnyis 'dir bri bar bya ste/ de yang 'ja' sa mu tig ma las 'di ltar 'byung ste/ tshe ring gnam gyi shed mong las/ bsod nams chen po'i dpal la brten nas/ rgyal po nged kyi lung / dge 'dun rnams dang / mi sde mang po la zlo ba/ 'jig rten 'di'i phun sum tshogs pa/ jim gir rgyal po'i khrims lugs bzhin spyad na 'byung