[A:54a]gang yin pa/ /de ni dpal stug dpal yin 'jigs med seng ge'i sgra chen kun tu sgrogs/ /zhes snyug ring la btags nas ka liM ka'i rgyal po'i sgor btags so zhes grag go /'di lta bu'i rang gi yon tan bsngags pa'i tshigs su bcad pa brjod pa ni mkhas pa thams cad kyi rnam par thar pa yin pas mdzes kyi gzhan du ni rang gi rigs dang / longs spyod dang / 'khor dang / dmag dpung dang / dbang phyug la sogs pa 'jig rten pa'i phun tshogs rnams kyi sgo nas nga rgyal smra ba ni mkhas pa rnams kyis khrel zhing rang ngo tsha ba'i gnas yin pas/ sngon byung ba'i dam pa de dag gis bsgrags pa'ang med pas de bzhin shes par byos shig thog mar shes bya kun la mkhas par byas/ /bar du mkhas pa'i tshogs su legs par bshad/ /phyis nas 'dris pa'i don la brtson par bsgom/ /dus gsum rgyal ba rnams kyi bzhed gzhung yin/ /zhes legs par gsungs so/ /gnyis pa shes bya ji lta ba'i don mkhyen pa'i tshul ni/ chos rje nyid kyi zhal nas kho bo yang gzhon pa'i dus su rje btsun chen po la bla ma'i rnal 'byor gyi byin rlabs zhus pas/ khyod kyis sangs rgyas kyi 'du shes mi skye khu bo'i 'du shes skye/ lus longs spyod kyis bla ma'i phyogs su dka' thub mi nus gsungs nas ma gnang / phyis 'chi ltas 'jigs pa cig byung / khams kyang ma bde/ de'i dus su rje btsun rin po che la sku khams ma bde ba zhag 'ga' byung / der nyin mtshan rgyun ma chad par gnyid dang kha zas kyi 'du shes kyang ma byas par zhabs tog byas/ des sdig pa cung zad dag pa