[A:51b]chen po'i go 'phang thob pa'i nus pa yod de/ de dag gi rnam par dbye ba yang dus gsum gyi de bzhin gshegs pa thams cad kyi ngo bo bdag cag gi chos kyi rje dpal sa skya pa chen po'i bka' drin gyis dpyis phyin/ lhag ma ma lus/ the tshom mi za bar rtogs pas nang gi shes bya kun rig ces smras pa yin no zhes gsungs pa de thams cad kyi don bsdus pa ni/ rnam dpyod blo gros mtshungs med nga / /zhes smos te/ rtog pa dang dpyod pa phyin ci ma log pa'i blo gros kyi tshig dang / don gyi 'gal 'brel phra ba dang / ches shin tu phra ba'i don sngar yongs su grags pa dang / ma grags pa'i shes bya'i gnas la blo zhan pa 'ga' zhig gis yun ring por 'bad du zin kyang legs par rtogs ma nus pa dag kyang / tshegs chung ngu'i bde blag tu rtogs shing khongs su chud pas/ shes bya'i gnas lngar grags pa de dag la mkhas pa rnams dang phan tshun brtsad cing dris na brjod bya dang mthun par lan 'debs par nus pa myong bas grub pas/ rnam dpyod blo gros mtshungs med nga / /zhes smras pa yin no/ /mtshungs pa med pa de'ang rang gi so sor rtog pa'i shes rab kyi sgo nas rtsom pa dang / rtsod pa dang / 'chad pa la de dag gi spobs pa nyams su lon pa dang / yul dang / dus dang / gang zag gi sa mtshams bzung nas smras kyi/ yul dang / dus dang / rang bzhin gyis bskal ba'i gang zag spobs pa nyams su ma len pa de dag la dgag pa dang bsgrub pa ga la nus/ des na mtshungs pa dang mi mtshungs pa'i rnam par dbye ba byas so/ /'jig rten pa phal che ba'ang mtshungs pa dang mi