[A:༢༢༦བ]ཐམས་ཅད་མཁྱེན་པ་བསོད་ནམས་ལྷུན་གྲུབ་ལེགས་པའི་འབྱུང་གནས་རྒྱལ་མཚན་དཔལ་བཟང་པོ་པའི་དྲུང་དུ་བསྟན་པའི་རྩ་བ་དགེ་བསྙེན་གྱི་སྡོམ་པ་རྣམ་པར་དག་པས་ཐུགས་རྒྱུད་བལྟམས་ཤིང་རབ་ཏུ་བྱུང་བའི་བརྟུལ་ཞུགས་ལ་གནས་པར་མཛད། གཞན་ཡང་མཁན་ཆེན་ཐམས་ཅད་མཁྱེན་པ་དེ་ལ་ཐུབ་པ་དགོངས་གསལ་གྱི་བཤད་བཀའ་སོགས་ཆོས་ཚུལ་དུ་མ་གསན་ཏེ། དེ་ནས་ལོ་དེ་ཉིད་ཀྱི་རྒྱལ་གྱི་ཟླ་བ་ལ་ངོར་ཨེ་ཝཾ་ཆོས་ལྡན་དུ་ཕེབས་ཏེ། ཟླ་བ་དེ་ཁའི་ཡར་ཚེས་བཅུ་གཉིས་ཀྱི་ཚེ་རྗེ་བཙུན་རྡོ་རྗེ་འཆང་དཀོན་མཆོག་འཕེལ་བའི་དྲུང་དུ་མཁན་པོ་ཞུས། ཆོས་རྗེ་གློ་བོ་མཁན་ཆེན་པས་སློབ་དཔོན་མཛད་ནས་དགེ་ཚུལ་གྱི་སྡོམ་པ་རྣམ་པར་དག་པ་མནོས་ཤིང་། མཚན་ཡང་དོན་དང་མཐུན་པར་འཇམ་དབྱངས་ཀུན་དགའ་བསོད་ནམས་གྲགས་པ་རྒྱལ་མཚན་དཔལ་བཟང་པོ་ཞེས་བྱ་བར་གསོལ་ཏེ། བསླབ་བྱའི་གནས་ཕྲ་ཞིང་ཕྲ་བ་ལ་ཡང་ཁ་ན་མ་ཐོ་བའི་དྲི་མས་མ་གོས་པའི་བཙུན་པའི་མཆོག་ཏུ་གྱུར་ཏོ། །དེ་ནས་མེ་ཕོ་འབྲུག་ལོ་རྗེ་དེ་ཉིད་དགུང་ལོ་བཅུ་གཉིས་ལ་ཉེ་བ་ཙམ་ན། མཁན་ཆེན་ཆོས་ཀྱི་རྗེ་དང་དཔོན་སློབ་ལྷན་ཅིག་ཏུ་དགེ་བའི་བཤེས་གཉེན་སྡེ་སྣོད་འཛིན་པ་དུ་མའི་འཁོར་དང་བཅས་ཏེ་གདན་ས་ཆེན་པོའི་ཕྱོགས་སུ་ཆིབས་ཀྱི་ཁ་ལོ་སྒྱུར་བར་མཛད་ནས་རིམ་གྱིས་ཕེབས་ཏེ། ལོ་གསར་གྱི་དཀར་ཕྱོགས་དགའ་བ་དང་པོའི་ཚེས་ལ་རྗེ་བཙུན་འཇམ་པའི་དབྱངས་ཀྱི་རྣམ་སྤྲུལ་ཆོས་རྗེ་ས་སྐྱ་པཎྜི་ཏ་ཆེན་པོའི་ཆོས་ཀྱི་ཁྲི་ག་ལ་བ་དེར། རྒྱལ་བའི་སྲས་ཀྱི་ལམ་པོ་ཆེ་ཐུབ་པའི་དགོངས་པ་གསལ་བ་ཞེས་བྱ་བའི་བསྟན་བཅོས་ཆེན་པོ་ཡོངས་སུ་རྫོགས་པ་ཉི་མ་གསུམ་གྱི་བར་དུ་ལེགས་པར་བཤད་