[A:29]དབོནདབེན་ཆུང་སླེབ་པ་ཡགས། ངེད་ཀྱང་ཁམས་ལྷག་པར་མ་བདེ་བས། འཆི་ས་དེ་བླ་མའི་དྲུང་དུ་བསྙགས་ནཱ་ལེནྡྲ་ཉིད་དུ་བྱེད་པས། སང་སྔ་བར་རྟ་ཞིག་གི་གྲབས་གྱིས་ཞེས་བཀའ་སྩལ་མཛད་པའི་ལུགས་བཞིན། ཇ་པ་དཔོན་དར་བའི་རྟ་ཀྱང་བུ་བཟང་བ་ཞིག་ལ་སྒ་བགྱིས་པའི་སྟེང་དུ་སྤྱན་དྲངས་ནས། ཞབས་འབྲིང་བ་འགའ་དང་བཅས་ནཱ་ལེནྡྲར་ཕེབས་པས། དེར་གླང་ཐང་བརྒལ་ནས་རིམ་གྱིས་ས་སྒང་ཞིག་ཏུ་ཕེབས་ཏེ། སྐུ་དུབ་པ་བསལ་ཕྱིར་ཅུང་ཞིག་ཆིབས་ཀྱི་སྟེང་ནས་ཕོག་སྟེ་སྐུ་ངལ་བསྟེན་པའི་ཞལ་གཟིགས་ཕྱོགས་ནཱ་ལེནྡྲར་ཕྱོགས་ལ་གནང་ཡོད་པའི་དུས། རོང་སྟོན་ཆེན་པོ་དབྱར་ཆོས་གསུང་བའི་ཁྲི་སྟེང་ན་བཞུགས་པའི་མཐའ་མ་ཁོར་ཡུག་གྲྭ་པས་བསྐོར་བ་གཟིགས་པའི་དེ་མ་ཐག་དབུ་ཞྭ་ཕུད་ནས་ཡན་ལག་བདུན་པ་ཞིག་གནང་སྟེ། དབོནདབེན་ཆུང་ཁྱེད་རང་སོང། རྗེའི་དྲུང་དུ་རྒྱུ་མཚན་ཕུལ། ད་ངའི་སྒྱུ་ལུས་ཀྱིས་མི་བགྲོད་པར་སྣང་ངོ༎ གསུང་ནས་སྐུ་བསྲང་སྟེ་སྤྱན་ལྟ་སྟངས་ཀྱི་ངང་ལ་བཞུགས་སོ༎
པཎ་ཆེན་རིན་པོ་ཆེས་མགྱོགས་པར་བསྐྱོད་དེ་ཕེབས་ནས་ཆོས་རའི་མཐའ་ནས་ཕྱག་མཛད་པར་བརྩམས་པ་ན། རོང་སྟོན་ཆེན་པོའི་གསུང་ལྷའི་རྔ་བོ་ཆེ་ལྟ་བུས། དབོན་ཆུང་ཁྱོད་ཀྱི་ཁུ་བོ་ནི་ངའི་སྙིང་གར་འཕོས་བྱུང་ངོ༎ ཞེས་བཀའ་སྩལ་དུ་གནང་ཞེས་དེ་དུས་ཆོས་ར་ན་དངོས་སུ་བཞུགས་པའི་ནཱ་ལེནྡྲའི་སློབ་དཔོན་བརྒྱ་རྡོར་གྲགས་པ་ནམ་མཁའ་དཔལ་བཟང་པོའི་གསུང་ལས། དྲིན་ཅན་སྤྱང་ལུང་པས་ལེགས་པར་གསན་པ་བདག་ལ་བཀའ་སྩལ་མཛད་དོ༎
དེར་ནཱ་ལེནྡྲ་དང། གླང་ཐང་གནས་སྒོ་རྣམས་སུ་དགོངས་རྫོགས་ཀྱི་རིམ་པ་བརྒྱ་ཆེར་བསྒྲུབ་པ་མཛད་རྗེས་སྐྱོར་མོ་ལུང་ཚོར་ཡང་མང་ཇ་འགྱེད་བཅས་ཀྱི་སྐུ་སྐལ་ཞུ་བ་ལ་ཞབས་གཏད་ཕེབས་ནས་འགའ་ཁང་གྲྭ་ཚང་དུ་སྔར་འབྲེལ་སྟབས་ཀྱིས་སློབ་དཔོན་ཚུལ་ཁྲིམས་པའི་དྲུང་དུ་ཐོག་མར་ཕེབས་པས། སློབ་དཔོན་པའི་གསུང་གིས། ད་རེས་ནོངས་ཀྱིས་ལེགས་ཁྲིད་གནང་མཁས་པ་ཆེན་པོ་དེ་ཞིང་བརྗེས་