[A:26]ལྡན་དྲི་མེད་ལེགས་པའི་བློ་གྲོས་ཀྱི་རྣམ་པར་ཐར་པ་ཞིབ་མོ་རྣམ་པར་འབྱེད་པ་ལས། རབ་ཏུ་བྱུང་ཞིང་དགེ་ཚུལ་གྱི་ཚུལ་ཁྲིམས་རྗེས་སུ་མནོས་པའི་སྐབས་ལས་བསྒྲགས་པའི་རབ་ཏུ་བྱེད་པ་བཞི་པའོ༎
Chapter 5: sngon byung gzhon nu mang len las chos kyi grags pas rtog ge'i tshul btsal ba ltar
དེ་ནས་ནམ་ཟླའི་དུས་ཀྱི་སྦྱིན་བདག་སོ་སོའི་སར་གནས་སྒོ་གྲྭ་ཚང་ཆོས་དབར་གར་འདེགས་པའི་གནས་དེ་དང་དེ་དག་ཏུ་སྐུ་བསྐྱོད་བཞིན་པའི་ངང་དང། བསླབ་སྦྱངས་ཀྱི་གནས་ལ་སྐད་ཅིག་ཙམ་ཡང་མི་གཡེལ་བའི་སྐབས་དེར་འདུལ་བ་མདོ་རྩའི་ཞོགས་འཛིན་དང། རྗེ་དོན་ཡོད་དཔལ་བ་ལ་ཉིན་རེ་བཞིན་དེའི་གཞུང་ཤོག་རེ་རེ་ནས་རྒྱུགས་འབུལ་མ་ཆད་པ་དང། རྗེས་འབྲེལ་བཤད་ཚོམ་ཀྱང་ཞུས་ལ། དོན་འདི་ལ་དགོངས་ནས་འདུལ་བའི་དཀའ་འགྲེལ་ཉི་མའི་ཤིང་རྟར། གང་འདིས་དང་པོར་གཞུང་གི་ཚིག་ལ་སྦྱངས༎ ཤེས་དང། མཆན་དུ་རྗེ་དོན་ཡོད་དཔལ་ཞེས་འབྱུང་ཞིང། གང་སྔོན་ནས་ལེགས་པར་སྦྱངས་པའི་སྟོབས་ཀྱིས་རྗེ་དོན་ཡོད་པ་ལ་རང་གིས་གསན་མ་ཐག་ཚིག་དོན་ཐུགས་སུ་བྱོན་ནས། དེ་མ་ཐག་གཞན་ལ་འདོམས་པ་འཇིགས་པ་མེད་པའི་སྤོབས་པ་བརྙེས་ཏེ། དགུང་ལོ་བཅུ་བཞིར་ཕེབས་པ་ལྕགས་མོ་བྱའི་ལོ་མངའ་རིས་པ་ནམ་མཁའ་སེང་གེ་ཞེས་པ་དང། ཤར་རྒྱ་མོ་རོང་པའི་དགེ་བའི་བཤེས་གཉེན་སྤྱན་གཅིག་པ་བགྱི་བ་གཉིས་ལ་རིགས་གཏེར་དང་མཛོད་ཀྱི་མཛུབ་ཁྲིད་ལེགས་པར་གནང་ཞིང། དེ་སྐབས་སྐུ་ན་ཚོད་གཞོན་པས་ཆོས་ཁྲིའི་ཁར་གྲྭ་པའི་སྒལ་པ་ལས་སྤྱན་འདྲེན། མཚན་སློབ་དཔོན་བུ་ཆུང་བར་གྲགས་ཞེས། ཆོས་གྲྭ་ཆེན་པོ་རྩེས་ཐང་གི་ལས་ཆེན་ཚུལ་ཁྲིམས་གྲགས་ལས་དངོས་སུ་ཐོས་ཚུལ་རྣམ་ཐར་རྡོར་རྒྱལ་མར་བཀོད་ཅིང། བཀའ་ལས་ངེད་རང་སློབ་གཉེར་གྱི་དུས་རང་ནས་སློབ་དཔོན་གྱི་དངོས་རྒྱུར་ཀུན་གྱིས་འཛིན། ཚད་མ་སོགས་ཀྱི་གཞུང་ཆོས་མ་འཁྱོར་བ་ཀུན་ཡོངས་ཀྱིས་འདྲི་བ་ཞིག་ཡོད་གསུང། ཞེས་གསུང་ཞིང།
ཆུ་ཕོ་ཁྱི་དགུང་ལོ་བཅོ་ལྔའི་ངོ་གཟིགས་ཙམ་དེ་ཡི་སྐབས། སྣེའུ་རྫོང་ནས་ས་དགེའི་གྲུབ་མཐའི་ཞལ་འཛིན་ལ་བརྟེན་པའི་བཀའ་ལུང་