[A:217]ཆོག་བྱས་ཚ་ཚ་བཏབ་པ་ལུགས་དང་མཐུན་ཞིང། ཡང་དབང་མ་བྱུང་ན་ངེད་ཀྱི་སྐུ་གདུང་བཞུགས་དགོས་པ་ཞེས་གསུང་འཕྲོ་ལ། དྲུང་ཆེན་སངས་རྒྱས་སེང་གེས་ཞལ་ཏ་གང་མིན་རང་མི་གསུང་བ་ཞུ། རྟོག་ཐོག་ལ་རེག་པའི་དངུལ་མེད་ཞུས་པས། དངུལ་འདི་ཀུན་ཀྱང་བཏང་བས་ཆོག། ཁྱེད་རང་དག་བློ་བདེ་མོ་འདུག་སྟེ། དེ་ལས་ཆུང་ན་ནཱ་ལེནྡྲར་དངུལ་གདུངས་མཁན་རྣམས་ལ་ངོ་མི་ཚའམ་གསུང་ནས། གཎྜི་སྒྲ་དབྱངས་དང་རྗེས་འབྲེལ་ཚོགས་སུ་ཆོས་ཀྱི་ཁྲིའི་སྟེངས་སུ་བཞུགས་ཤེས་རྣམ་ཐར་མ་ཏི་མར་འབྱུང་བ་བཞིན། མཁས་པ་སངས་རྒྱས་འོད་ཟེར་བ་དང། མངའ་རིས་པ་ཧོར་སྒོམ་རབ་འབྱམས་པ་སྨྲ་མཁན་མང་པོ་གུང་འགྲིག་པ་བཞིན་ཞིབ་པར་བྲིས་ལ། རྣམ་ཐར་རྡོར་རྒྱལ་མར་ངེད་ཆོས་ཁྲི་འདི་ལ་དྲིན་ལན་མཇལ་དགོས་པས་ཐུགས་དམ་བྱེད་ཅིང་འདི་ཁར་སྡོད། སློབ་དཔོན་ཚོས་གྲོགས་ལྡན་རེ་ཤོད་གཎྜི་དང་བསྟུན་ནས་གསོ་སྦྱོང་ལ་འཚོགས་ཤོག་གསུངས་ནས། དེ་བར་ཁྲི་ཁར་བཞུགས་གཎྜི་མ་བྱུང་ཙམ་ལ་པཎ་ཆེན་རྡོར་རྒྱལ་བས་སྐུ་དྲུང་དུ་བྱོན་པ་དང། དེ་སུ་རེད་གསུང། གཟིམ་དཔོན་རྣམ་རྒྱལ་བས་སློབ་དཔོན་རྡོར་རྒྱལ་བ་རེད་ཞུས་པས། གཎྜི་སྙན་པོ་ཨེ་སྣང་གསུང། སྣང་ལགས་ཞུས་པས། ཆོས་ཀྱི་གཎྜི་སྒྲ་བོ་ཆེ༎ ཟེར་བ་ཡིན། འདི་དཔལ་ཁོར་བདེ་ཆེན་ནས་ཇ་གནས་ཞིག་གིས་ཕུལ་བའི་གསར་པ་དེ་ཡིན༎ རྙིང་པ་བྱིན་རླབས་ཅན་དེ་ཆོས་འཁོར་ཆེན་མོའི་དུས་ཆོས་འཁོར་རྩེ་བ་ལ་ཕུལ་ནས་ཡོད་གསུང་པས། ཆོས་འཁོར་རྩེར་གཎྜི་བརྡུངས་ལ་ཤོད་ཅེས་གསུང་བར་གོ་ཞེས་འབྱུང་ངོ༎
དེར་དགེ་འདུན་གྱི་ཚོགས་ཀྱིས་འདུ་ཁང་ཁྲིག་ཁེངས་པས་ལྷག་པར་མཉེས་ནས། རང་རེས་སྔོན་ཐོག་མ་འདུ་ཁང་རྙིང་པར་དབྱར་གནས་སྔ་མ་བྱས་དུས་དཀར་པོ་བྲག་པའི་རྒན་ཞུགས་གཅིག་དང་