[A:153]པཎ་ཆེན་གྱི་ཞབས་ཕྱི་ལ་ཡོད་པའི་དེ་དུས་ཀྱི་གྲྭ་རྒན་ཀུན་ངག་མཐུན་པར་བརྗོད་པའི་ངག་སྒྲོས་དག་ངེས་ཡིན་ནོ༎
དེར་གསེར་མདོག་ཅན་དུ་འབྲུག་ལོ་vc: 1484འི་དགུན་ཆོས་ལེགས་པར་གནང་ནས། དཔྱིད་སོས་ཤིང་མོ་སྦྲུལ་ལོ་vc: 1485ཤར་བ་ན་དཔྱིད་ཆོས་ཆུ་མིག་ཏུ་གནང། སྣར་ཐང་སྟོང་དཔོན་ཤེས་རབ་བཟང་པོ་བས་ཀྱང་ཟླ་ཕྱོགས་ཤིག་ཕུལ་ཞིང། དེར་ཚོགས་པའི་སྐྱ་བཙུན་སྟོང་ར་ཙམ་ལ་སྒྲུབ་ཐབས་རྒྱ་མཚོའི་རྗེས་གནང་སྩལ་བའི་མྱ་ངན་མེད་པའི་སྒྲོལ་མའི་རྗེས་གནང་གི་སྐབས་གཙང་ཁང་ན་མི་སུ་ཡང་མེད་པ་ལ། ཨོཾ་ཏཱ་རེ་ཞེས་ཡི་གེ་བཅུ་པའི་སྒྲ་གསང་འཁར་རྔ་དཀྲོལ་བ་ཙམ་དེར་འདུས་ཡོངས་ཀྱིས་ཐོས་པ་བྱུང་བས། ཆུ་མིག་གི་རྗེ་བཙུན་སྒྲོལ་མས་གསུང་བྱོན་ཞེས་གྲགས་པའི་གཡེད་ཆེ་བ་བྱུང་ཞེས། རྡོ་རིངས་ཀུན་སྤངས་རིན་པོ་ཆེའི་གསུང་ལས་ཐོས་སོ༎
དེ་ནས་ཀྱང་དབྱར་གནས་ལ་གསེར་མདོག་ཅན་དུ་ཕེབས་ནས་དབྱར་ཞལ་བཞེས་དང། དགུང་ལོ་ང་བརྒྱད་པའི་དུས་འདིར། མངོན་པ་མཛོད་ཀྱི་མཐའ་བཅད་བྱེ་བྲག་བཤད་མཚོའི་ཐུགས་རྩོམ་དབུ་འཛུགས་པ་གནང་ཞིང། དེ་དུས་རྗེ་བཙུན་རིན་པོ་ཆེ་ཁོག་ལུང་པ་བཞུགས་ས་བླ་བྲང་མདུན་གྱི་ཕུག་མོ་ཆེར་གནང་ནས། ཕར་ཕྱིན་སྐྱོར་རན་དུས། ཐོག་མར་སྐྱབས་འགྲོ་སེམས་བསྐྱེད་ཚད་མེད་བཞི། ཨོཾ་ཤུ་ཉ་ཏ་སོགས་རྗེས། བཤར་སྦྱངས་གནང་བ་པཎ་ཆེན་རིན་པོ་ཆེས་གསན་པས། ཕར་ཕྱིན་སྔགས་ལུགས་པར་མཚན་བཏགས་ཤིང། དེར་ཐུགས་སྦྱོང་མཐར་ཕྱིན་ནས་ས་སྐྱར་གྲྭ་སྐོར་ལ་ཕེབས་དུས། རིགས་གཏེར་རང་འགྲེལ་ཞིག་ཡོད་དམ་ཞེས་རང་རེའི་ལས་ཆེན་ཀུན་ཤེས་པས་གསུངས་པས། སྔར་བློ་ལ་ནི་མེད། དཔེ་ཡོད་ན་གཟུང་བས་ཆོག་ཞུས་པས། ད་གྲྭ་སྐོར་དུས་ཐུག་འདུག་པས་གཟུང་ཀྱང་མི་ཟིན། དཔེ་རང་ངེད་ཀྱིས་གཡར་ཆོག། ཅིས་ཀྱང་འཛིན་ན་མཚན་མོ་ཡང་དཔེ་འཛིན་མཛོད་ཅེས། མར་ནག་དམ་པེ་གང་དང། རང་