[A:440]སྲས་རྣམས་ཡི་ཕྱོགས༎
གང་དུ་བཞུགས་པའི་འགྲོ་རྣམས་ཀྱི༎
བློ་མཚོའི་ཆུ་གཏེར་བརྙོགས་པ་ན༎
སྐུའི་དཀྱིལ་འཁོར་ཕྲིན་ལས་ཀྱི༎
ཆ་ཤས་རྫོགས་པར་མི་འཆར་བ༎
འདི་ལ་མྱ་ངན་མི་བྱ་སྟེ༎
བཤད་སྒྲུབ་རྒྱུད་འཛིན་བུ་སློབ་ཀྱི༎
ཉི་མ་གསལ་པོ་རྟག་ཏུ་འཆར༎
དེ་ནས་ས་མོ་བྱའི་ལོ་ཧོར་ཟླ་བཅུ་པའི་དུས་ཆེན་ལ། སྐུ་གདུང་རིན་པོ་ཆེ་ཙན་དན་གྱི་ཞུགས་ལ་ཞེན་པར་མཛད་པ་དེའི་ཚེ། ཡུལ་ལྗོངས་ཀྱི་སྐྱེ་བོ་རྣམས་ཀྱིས་མཆོད་པའི་ཚོགས་མང་པོས་ས་གཞི་མངོན་པར་བཀྲ་ཞིང། ལྷའི་ཚོགས་ཀྱིས་མངོན་པར་སྤྲུལ་པའི་མེ་ཏོག་གི་ཆར་ཆེན་པོ་ཉིན་མཚན་དུ་མར་ཕེབས། ཁ་སྣ་ལྔའི་རིང་བསྲེལ་གྱི་ཚོགས་ལྷུག་པར་བྱོན་པ་གྲངས་ལས་འདས་ཤིང། གདུང་ཚ་བཏབ་པ་ལ་མར་གྱི་གོང་བུར་ཡུངས་ཀར་གྱི་ཚོགས་གཏམས་པ་ལྟ་བུར་གྱུར་པ་ནི་གྲངས་ལས་འདས་ཏེ། ཇི་སྐད་དུ།
འཕགས་པ་རྣམས་ཀྱི་རིང་བསྲེལ་ནི༎
བསོད་ནམས་སྟོབས་ལས་འཁྲུངས་པ་སྟེ༎
ལུས་ཅན་རྣམས་ཀྱི་བསོད་ནམས་རྟེན༎
རྒྱུན་མི་ཆད་པའི་རྒྱུ་ཡིན་ནོ༎
ཞེས་གསུངས་པ་དེ་ཉིད་དོ༎
དེ་ལྟར་སྐུ་ཚེ་མཐར་ཕྱིན་པའི་རྗེས་ཀྱི་མཛད་པ། མཆོད་འབུལ་དང་སྦྱིན་གཏོང། གསོལ་བ་འདེབས་པའི་རྟེན་ཡིན་ཐང་དང། ཕྱི་ནང་གི་གདུང་རྟེན་དུས་ཆེན་གྱི་མཆོད་པ། ཟླ་དུས་ཀྱི་སྒྲུབ་མཆོད་རྣམས་ནི་རྗེ་གོང་མ་རྣམས་ཀྱི་ལམ་སྲོལ་ཇི་ལྟར་ཡོད་པ་བཞིན། དབུས་གཙང་གི་གདན་ས་ཆེ་བ་དང། ཞིང་དག་པའི་ཆོས་གྲྭ་རྣམས་དང། ཡུལ་ལྗོངས་ཀྱི་སྐྱེ་བོའི་སྦྱིན་གཏོང་སོགས་ཇི་སྙེད་པ། གདུང་ཉེ་བའི་ཞལ་ངོ་ཞལ་བཞུགས་པ་རྣམས་དང། ཕྱོགས་ཀྱི་ཐ་གྲུ་ན་ཡོད་པའི་བུ་སློབ་རྣམས་ཀྱིས་སྔར་སྲོལ་དག་ལས་ཀྱང་ཆེས་ཁྱད་པར་དུ་འཕགས་པ་ཙམ་དུ་གྲུབ་པ་ལས། བྱེ་བྲག་ཏུ་ནང་རྟེན་རྡོ་རྗེ་འཆང་རྒྱབ་མཐོ་བཅུ་གསུམ་པ། བལ་པོའི་བཟོ་གནས་པ་མཁས་པས། ལྟ་པས་ཆོག་མི་ཤེས་པ་ཉིད་དུ་གྲུབ་ཅིང། ནང་བཞུགས་བྱིན་