[A:312]ཕྱིན་པར་གྱུར་པ་ནི་བདག་ཉིད་ཆེན་པོ་འདི་ལྟ་བུ་གཞན་ལ་མེད་པ་ཡིན་ཏེ། བདག་ཉིད་ཆེན་པོ་འདིས་ནི། རྙེད་པ་དང། བཀུར་སྟི་དང། བཟའ་བ་དང། བགོ་བ་དང། གཉིད་དང། རྨུགས་པ་ལ་སོགས་པའི་རོ་མྱང་བར་མི་མཛད་ཅིང། འཇིག་རྟེན་ཆོས་བརྒྱད་ཀྱི་རྣམ་པར་རྟོག་པ་གང་ཡང་མངོན་དུ་མི་མཛད་པར་ཚད་ལྡན་གྱི་གཞུང་ལུགས་རྣམས་ཁོ་ན་ལ་ཚིག་བྱང་ཀྱང་མ་འཁྲུལ་བར་སྦྱངས་པ་མཐར་ཕྱིན་པར་མཛད་པའི་ཕྱིར་རོ༎
དེའི་རྒྱུ་མཚན་གྱིས་དགུང་ལོ་བརྒྱད་ཅུ་རྩ་གསུམ་གྱི་མཐར་སོན་པའི་ཚེ་ཡང། གཞུང་ལུགས་ཆེན་པོ་ཤིན་ཏུ་ཆེན་པོ་དག་གི་ཚིག་ཕྱེད་ཀྱང་མ་འཁྲུལ་བ་ཐུགས་ནས་གསུངས་པ་ལ་ཐོགས་པར་མེད་པར་མངོན་སུམ་གྱིས་གྲུབ་པ་ཡིན་ནོ༎
གཞུང་ལུགས་གང་དང་གང་འཆད་ཀྱང༎
དེ་ཡི་ཚིག་ལ་སྦྱངས་སྙམ་བྱེད༎
སྐབས་འགར་དོན་ལས་ཚིག་རྙེད་པ༎
ཁྱེད་ལས་གཞན་པ་སྔོན་མ་བྱུང༎
1.2.4.1.2
དོན་ལ་མཁས་པ།
གཉིས་པ་དོན་ལ་མཁས་པ་ནི། སྤྱིར་མཁས་པ་ཞེས་བྱ་བའི་གྲངས་སུ་འགྲོ་བ་ལ། གཞུང་ལུགས་གང་དང་གང་ཡིན་པ་དེའི་དོན་ཕྱིན་ཅི་མ་ལོག་པར་ཁོང་དུ་ཆུད་ནས་དེའི་དབང་དུ་བྱས་པའི་མདོ་རྒྱས་ཀྱི་བསྟན་བཅོས་རྩོམ་ཤེས་པ་ལ་བྱ་བ་ཡིན་ལ། དེའི་ཚུལ་ཡང་བདག་ཉིད་ཆེན་པོ༎
འདི་ལྟ་བུ་གཞན་ལ་མེད་པ་ཡིན་ཏེ། འདིས་ནི་ཕལ་ཆེར་ཚིག་ཐུགས་སུ་ཆུད་མ་ཐག་ཏུ་དོན་མཁྱེན་ཅིང། དོན་མ་མཁྱེན་པ་དེ་སྲིད་དུ་ཚིག་ཙམ་གྱིས་ཆོག་པར་འཛིན་པ་ནི་འདི་ལ་མི་མངའ་བའི་ཕྱིར་རོ༎
དེའི་རྒྱུ་མཚན་གྱིས་གཞུང་ལུགས་གང་དང་གང་གསུངས་པ་ན་དེ་དང་དེའི་སྙིང་པོའི་དོན་ནི་འདི་ཡིན་ནོ་ཞེས་འཆད་པ་ལ། འདི་དང་མཚུངས་པ་གཞན་མེད་པ་མངོན་སུམ་གྱིས་གྲུབ་ཅིང། འཆད་རྩོད་རྩོམ་གསུམ་གྱི་མཛད་པ་གང་མཛད་པ་གང་