[A:༥༩༡]པ་ལ་ངམ་རིངས་ཀྱི་ཆོས་སྡེ་ཆེན་པོར་སློབ་དཔོན་ཆེན་པོ་བློ་གྲོས་རྒྱལ་མཚན་པ་དང༌། དེའི་སློབ་ཆུང་དགེ་བའི་བཤེས་གཉེན་སངས་རྒྱས་བློ་གྲོས་པ་དཔོན་སློབ་ཀྱི་དྲུང་དུ་བསྙེན་ཏེ། གཙོ་བོར་ཕར་ཚད་ལ་ཐུགས་སྦྱོངས། སངས་རྒྱས་བློ་གྲོས་པ་ལས་ཇོ་བོའི་ཆོས་ཆུང་བརྒྱ་རྩའི་ལུང་རྣམས་གསན་ཏེ། ཉེར་གསུམ་པ་ལ་ཆོས་གྲྭ་དེ་ཉིད་དུ་གྲྭ་སྐོར་ཡང་མཛད་དོ། །ཉེར་བཞི་པ་ལ་བཟང་ལྡན་གྱི་མཁས་པ་ཆེན་པོ་ཐུགས་རྗེ་དཔལ་བ་ལ་སྟོད་ལྷོར་བྱོན་པའི་ཆག་ཕྱིར་བྱོན། ལོ་གཅིག་ཙམ་བཞུགས་ནས་ལུང་རིགས་ལ་ལེགས་པར་སྦྱངས་ནས་དངོས་སྟོབས་རིགས་པའི་དབང་ཕྱུག་ཆེན་པོར་གྱུར་ཏོ། །ཕ་རོལ་གྱི་རྒོལ་བ་གང་ལ་ཡང་མི་འཇིགས་པའི་སྤོབས་པ་ཐོབ་པར་གྱུར་ཏོ། །ཉེར་ལྔ་པ་ལ་འཛམ་གླིང་མཁས་པའི་དབང་པོ་གཡག་སྤྲུག་སངས་རྒྱས་དཔལ་ལ་སྟོད་ལྷོར་ཕེབས་པ་དང་མཇལ་ཏེ། ཕར་ཕྱིན་གྱི་བཤད་པ་ཚར་ཕྱེད་དང་གཉིས། མདོ་སྡུད་པ། མི་གཡོ་བ་དཀར་པོའི་སྒྲུབ་ཐབས་ཀྱི་ལུང༌། དབུ་མ་ལུགས་ཀྱི་སེམས་བསྐྱེད་རྣམས་གསན་ཏེ། དེ་ཉིད་ཀྱི་ལོ་གདན་ས་ཆེན་པོ་དཔལ་ལྡན་ས་སྐྱར་གྲྭ་སྐོར་མཛད་དེ་བཤད་པ་དང་སྟོན་པ་ལ་ཀུན་གྱིས་མཐུན་སྣང་དུ་གྲུབ་པར་གྱུར་ཏོ། །ཉེར་དྲུག་པ་ལ་མདོག་གི་ཚ་སྣ་ཞེས་བྱ་བའི་གཙུག་ལག་ཁང་དུ། གངས་ཅན་མཁས་པའི་གཙུག་རྒྱན་སེམས་དཔའ་ཆེན་པོ་གཞོན་ནུ་རྒྱལ་མཆོག་པ་དང་མཇལ་ཏེ། ཆག་ཕྱིར་བྱོན། ལུང་རིགས་ལ་ཐུགས་སྦྱངས་ནས། ཉེར་བདུན་པ་ལ་གནས་གསར་དུ་ཆོས་རྗེ་ནམ་མཁའི་རྣལ་འབྱོར་པ་མཇལ་དུ་བྱོན་པས། སྔར་གཅོད་ཁྲིད་ཞུས་པའི་དུས་ཀྱི་དགེ་སྦྱོར་གྱི་བརྩོན་པ་དྲག་པོ་དང༌། ཉམས་རྟོགས་ཀྱི་འཁྲུངས་ལུགས་ཁྱད་པར་ཅན་རྣམས་ལ་ཐུགས་དགྱེས་པའི་སྟོབས་ཀྱིས་ནི་གུ་ཅིག་ཞུས་ནས་དགེ་སྦྱོར་ལ་དྲིལ་བ་ཅིག་འཐད་ཅེས་པའི་ཞལ་ད་གནང་བ་ལ། འདུལ་མངོན་དང་དབུ་མ་རྩ་འཇུག་སོགས་པུུ་སྟི་འགའ་ཡར་ཞིག་ལ་གྲྭ་སྐོར་བྱས་ནས། དེ་ནས་དགེ་སྦྱོར་ལ་དྲིལ་བ་ཞུ་ཞེས་ཞུས་པས། ཆོས་ཀྱི་དོན་གོ་ན་གྲྭ་སྐོར་མ་བྱས་ཀྱང་