[A:༥༨༨]དང་པོ་ལ་བརྒྱད་དེ། རིགས་ཁྱད་པར་ཅན་དུ་འཁྲུངས་པའི་ཚུལ། ངེས་འབྱུང་གི་བསམ་པས་བསྐུལ་བའི་ཚུལ། བསྟན་པའི་སྒོར་ཞུགས་པའི་ཚུལ། ཐོས་བསམ་གྱིས་རྒྱུད་སྦྱངས་པའི་ཚུལ། བསྒོམ་པས་ཉམས་སུ་བླང་བའི་ཚུལ། བླ་མ་ལྷ་ཡིས་རྗེས་སུ་བཟུང་བའི་ཚུལ། འབྲས་བུས་བསྟན་པ་ལ་བྱ་བ་བྱས་པའི་ཚུལ་བསམ་གྱིས་མི་ཁྱབ་པའི་རྣམ་ཐར་གཞན་བསྟན་པའོ། །དང་པོ་ནི། རྒྱ་ཆེན་སྨོན་ལམ་ཞེས་སོགས་ཚིགས་བཅད་གཅིག་སྟེ། འགྲོ་བ་མགོན་མེད་པ་རྣམས་ཀྱི་མགོན་དུ་གྱུར་ཅིག་ཅེས་པའི་སྨོན་ལམ་གྱིས་སྔོན་བསགས་པའི་ཚོགས་གཉིས་ཀྱི་ཆུ་གཏེར་བསྲུབས་པ་ལས། །སྡེ་སྣོད་གསུམ་དང་རྒྱུད་སྡེ་བཞིའི་བསྟན་པ་གསེར་གྱི་རི་བོས་བསྐོར་བའི་གངས་རིའི་ཁྲོད་འདིར་དལ་འབྱོར་གྱི་ལྷུན་པོ་བརྙེས་ཏེ། དེ་ཡང་དབུས་གཙང་རུ་བཞིར་གྲགས་པའི་གཡས་རུ་བྱང་གི་ཆ་འཕགས་པ་འཇིག་རྟེན་དབང་ཕྱུག་གིས་བྱིན་གྱིས་བརླབས་པའི་སྐྱེས་ཆེན་དུ་མ་བྱོན་པའི་མུས་ཀྱི་ལུང་པའི་སྟོད། རྟ་མོ་གླིང་སྐྱ་ཞེས་བྱ་བར་ཡབ་དཀོན་མཆོག་བཟང་པོ་ལོ་སོ་བཞི་ལོན་པའི་དུས་སུ། ཡུམ་ནམ་མཁའ་སྐྱོང་ལས། ས་ཕོ་འབྲུག་གི་ལོ་ལ་རྗེ་འདི་ཉིད་འཁྲུངས་པའི་མཚན་དཀོན་མཆོག་དར་ཞེས་བྱའོ། །དེ་ཡང་འདིའི་རིགས་ཞང༌། རུས་པ་ལྡོང་ཡིན་ལ། ཡང་མེས་ཞང་འོད་ལྡན་དེས་མུས་སུ་བྱོན། དེའི་སྲས་པོ་ཞང་གཡུང་དེ་བཅུ་གཅིག་ཞལ་ལ་ཐུགས་དམ་དུ་མཛད་པས་ལོ་གྱ་དྲུག་ཐུབ། དེའི་སྲས་དཀོན་མཆོག་བཟང་པོ་སྟེ། ནམ་མཁའ་བློ་གྲོས་པ་ལ་རབ་བྱུང་ཞུས་པའི་མཚན་དཀོན་མཆོག་དཔལ། དེ་ནས་ཇོ་ནང་པ་ནམ་ཆོས་པ་ལ་དོན་ཞགས་དང༌། སྦྱོར་དྲུག་ཞུས། མུས་ཆེན་ནམ་མཁའི་རྣལ་འབྱོར་པ་ལས་ཁྲིད་ཟབ་མོ་འགའ་ཞིག་ཞུས་ཏེ། དོན་ཞགས་ཀྱི་གཟུངས་དང་ཡི་གེ་དྲུག་པ་ལ་ཐུགས་དམ་མཛད་པ་ཞིག་སྟེ། དེས་ན་རྗེ་འདི་ཉིད་ནི་སྐྱེས་བུ་དམ་པའི་རིགས་སུ་འཁྲུངས་པ་ཡིན་ནོ། །གཉིས་པ་ནི། གཞོན་ནུ་ཉིད་ནས་ཞེས་སོགས་ཚིགས་བཅད་གཅིག་དང༌།