[A:125a]pa kun la nged la rmi lam 'di bzhin byung zhes snga bar gsungs pa'i phyi dro'i cha la bab pa tsam na/ bod kyi rdo rje gdan dpal sa skya'i chos grwa chen po nas sprul sku mgon po tshe dbang dpon g.yog rnams/ dpal sa skya pa chen po sngags 'chang grags pa blo gros rgyal mtshan dpal bzang pos thugs dam dang bcas gsang sngags bde chen gling gi mkhan por rje nyid spyan 'dren la rdzong bar mdzad pa rnams 'byor byung bas/ rje'i gsung gis/ spyir dgon pa'i 'dzin skyong dang / chen po'i mchod gnas sogs blo la gtan nas med kyang da lam ni phyin na legs pa 'dug ste/ mdangs nub rmi lam du byung ba'i mi nag po de gur gyi mgon po yin tshod du 'dug la ban chung de zhal bzhi pa'i sprul par 'dug gsungs shing / 'di lta bu sa skya pa'i chos skyong gi gtso bo chen po gnyis kyang bdag cag gi bla ma 'di la gus 'dud kyi sgo nas spyan 'dren gyi pho nyar byon pa'i mtshan ma yang dag