[A:111b]'dis byas 'gyur du sku mtshams lo gsum thengs gnyis gnang ba'i snga ma'i dus su/ shing mgon yid bzhin nor bu'i thugs ka nas 'od sngon po zhig byung ba/ rje nyid kyi thugs kar thim pa'i gsal snang dang bcas/ brag phug chen po me 'bar ba zhig gi khrod na bzhugs pa'i dpal gur gyi mgon po'i sku gzi brjid dang ldan pa zhig mngon sum du gzigs pa dang / sgo rum gyi bse mgon yid bzhin nor bu la yang las bzhi thogs med du 'grub pa'i gzigs snang ngo mtshar can byung tshul gong du brjod pa ltar yin pas/ de lta bu yang ye shes pa dngos kyi zhal bstan pa dang khyad par mi 'dug cing / yang zhing skyong tsa turmu kha nyid kyi sku'i snang brnyan bstan cing 'phrin las sgrub pa'i sgo nas rten rdo khyad par can gyi bka' babs byung ba'i tshul ni/ rje nyid dgung lo nga dgu tsam bzhes pa'i ston gyi cha la stod byang gsang sngags rnying ma'i dgon gnas srid gsum drag po dpal 'bar gyi slob dpon rin po che'i gzim phug tu bzhugs pa'i skabs