[A:265]med pas/ kho bo cag de mi 'dod zer ba na/ rgyal po la sogs pa dpang por bzhag ste/ nga nyid skye ba len pa yin pas dpral bar rtags thob cig byas nas des dpral bar mtshal gyi thig le sha thim pa zhig byas/ kha nang du mu tig bcug ste/ de nyid du 'das te de'i lus zangs kha sbyar gyi nang du bcug ste rgyal pos rgyas btab bo/ de'i tshe rgyal rigs kyi paNDi ta bi sha sa kha zhes bya ba'i bur skye ba blangs pa bzhin/ de la khye'u mtshan dang ldan pa zhig btsas ma thag tu/ mtshalagyi thig le dpral bar yod pa kha na mu tig yod pa de byung / rgyal po sogs kyis sngar gyi phung po de la bltas pas/ dpral ba'i mtshal gyi thig le yang byi/ mu tig gi shul har re 'dug go/ /der mu stegs de yang skye ba snga phyi yod par yid ches skad/ khye'u des ma la btsas ma thag tu phyag byas te/ zla ba bcu 'o brgyal bar ma gyur tam byas pas/ byis pa btsas ma thag smra ba ni ltas ngan no snyam nas kha rog 'dug byas so/ /
de nas lo bdun gyi ngar cang la smras pas lkugs pa'o snyam mo/ /der mu stegs kyi rgol ba zhig gis/ shin tu go dka' ba'i snyan ngag gi tshigs su bcad pa sangs rgyas pa'i grub mtha' 'gog pa zhig brtsams nas rgyal po dang mkhas pa'i tshogs la 'grims so/ der bi sha sa kha'i khyim du byung ba na/ de yun ring du brtags pas sgra don ji bzhin go ba yang med na lan gdab par ga la nus te/ don de sems shing khyim gyi phyi rol tu bya ba zhig la song ngo / de tsandra go mi la bdun lon pa des bltas pa na/ don shes shing lan gdab par dka' ba med de/ de'i don 'grol ba'i yig chung btab/ lan gyi tshigs bcad kyang bris so/ /