[A:610]rgyal po de 'khor re 'gro ba zhig gzigs pa dang / lhag par bdag thugs rje'i gzigs pa mi lhod par gnang gin yod gda' bas zla ba de ga'i nang du rje btsun chos kyi rgyal po bka' drin mtshungs med tshar pa rjes myug nas phyag dam bdud rtsi ril bu'i thums gsol ras dang bcas phebs byung ba'i nang na khyod kyi sgrub khang der gnas rnying rgyal po 'di 'phral 'phral 'gro ba zhig 'dug pas bar chad dam 'tshub kyi rnam pa bzhin mi 'ong 'dug gam/ ngas kyang dmigs pa sogs gang yong byed kyin yod lar rdo ring rin po cher rang re'i brgyud 'dzin kun la gnod pa mi byed pa'i srog snying phul nas dam bca' 'o skol rnams la 'di gcig pu'i bka' drin yang bsam pa'i ra ba las 'das/ gang ltar de la dmigs pa'i gtor ma 'dra dang dge sbyor 'bungs skyed de byed pa dang lhag par lam zab mo nyid la nan tan gyis rtag tu gsol ba thob/ gegs sel bogs 'don gyi skyel so 'di gcig pu yin no gsung pa zhig phebs byung zhes bslab ston rgyas par stsal/ zha lu'i gdan sa kun spangs mdzad pa nas bzung rgyal khams phyogs med kyi gdul bya'i re ba skong ba tsam ma gtogs 'jig rten za zi'i mthun 'jug la thugs sun pa'i tshul gyis spong ba bsam gtan la bzhol ba'i rnam pas rmu gshong du lo gsum phyogs gsum mdzad pa'i skabs 'jam dbyangs mkhyen brtse'i rnam thar du lcags sprel zla ba brgyad pa'i tshes gcig nas gzhi bsnyen gyi sngon 'gro bla ma'i rnal 'byor tshugs pa'i tshes bzhi'i nub rmi lam du rje btsun rdo rje 'chang pha tshar pa rje dang mjal rta 'grin yang gsang gi dbang rdzogs par gnang / dkyil 'khor gtor ma dbang tshig sogs kyang shin tu