[A:602]rkyen gyis dus kyi pho nya'i dbang du song / rnam sras mchod pa sogs rgyas par mdzad/ me 'brug lo nag pa zla bar kun mkhyen mkhyen brtse'i zhabs/ khyab bdag bod mkhar ba chen po/ mkhyen rab chos rje'i dbon po sogs grwa pa nyis brgya lhag pa la 'jam dpal gshin rje gshed dmar po lha lnga'i dbang cha dgu tsam dang / spros med kyi 'khrid sogs so so'i blo dang 'tsham pa'i dbang rjes gnang lung man ngag rgya cher stsal/ sgrub mchod chen mo'i tshogs dbur phebs pa'i gung gseng zhig la chos rje thams cad mkhyen pa'i sku 'dra'i drung du gcig pur bzhugs te gdung shugs drag po'i gsol 'debs mdzad pas sku de gzi mdangs je cher rgyas shing sku'i cha shas thams cad las 'od zer sna lnga 'phros nas bar snang khyab pa dang slar tshur 'dus la la rje nyid kyi sku la thim/ la la sku 'dra rang la thim pa'i thugs nyams shar/ mi ring bar sprul sku bde bsam pas gzigs snang ji ltar byung ba'i sku zhig kyang thugs dam rten la bzheng du bcug /ri mthil gyi sgrigs kun spyod sgrub mchod che chung sogs chos rje thams cad mkhyen pa'i dus kyi srol rgyun nyams pa rnams gsos te bstan pa rin po che nyin mo ltar gsal bar mdzad/ re zhig stod phyogs su phebs grang mo che dang rmu gshong du rgyang tsam stan chags nas zha lur phebs skabs shig lha mo rdo rje rab brtan ma'i gtor ma zhal bsgyur ba sogs dpal ldan ma 'dis 'phrin las thams cad sgrub pa'i dgyes mtshan gsal bar bstan/ me sbrul zla ba dang po'i nang du thams cad mkhyen pa mkhyen brtse'i zhabs kyis gtsos phyogs 'dus kyi slob ma mang du byon/ ri phug chos kyi pho