[A:552]thag chod na mi btub snyam/ ma dad ma gus pa ye ma byung ba byas/ de yang spyir theg chen gyi gang zag gis sems can thams cad drin can gyi pha mar shes nas dag snang sbyong ba dang / bye brag tu gsang sngags bla med kyi sgor zhugs pa rnams kyis cir snang thams cad lha dang ye shes kyi rnam rol du shes par byas nas de dag la dad pa dag snang tshad du bskyal nas so so'i rang zhal rjen par mthong ba'i mod la lhug par skyong ba 'di gnad du yod pas de ga'i ngang du mnyam par bzhag pa lags so/ /rje yongs grags kyi sangs rgyas karma pa/ /bod skye bo kun 'dus pa'i gnas gcig pu/ /khyed bslu med kyi skyes bu los kyang yin/ /khong dad can kun 'khor ba'i mtsho las sgrol/ /sems log rtog gi sprin gyis ma bsgribs kyang / /khyed mdzad spyod kyi rnam thar 'od dkar gyis/ /nga snying dbus kyi padma bzhad ma nus/ /dus da res rgya lam srong ba zhu/ /khong phal cher gyis mjal ba stong 'ur yin/ /khong la la dag mjal ba de che 'dod yin/ /khong 'ga' zhig mjal ba ltogs 'dod yin/ /khong de 'dra tsho snying nas dad pa min/ /nga skad stong la rgyug pa'i khyi rgan min/ /nga lto phyir du rgyug pa'i sprang rgan min/ /nga zol zog gis 'khor ba'i blun rgan min/ /nga dgon chung gis phongs pa'i bla rgan min/ /gnas dpal ldan sa skya'i dben gnas mchog /dpal kha'u'i brag gi pho brang na/ /rje rnal 'byor dbang phyug rdo ring pa'i/ /thugs gcig tu 'dres pa'i gces phrug yin/ /ma bdag med mkha' 'gro'i thugs kyi bcud/ /rje rnal 'byor dbang phyug zhal gyi rgyun/ /