[A:549]la'ang dag snang ci yang skyes/ zhes 'byung bas bsam sdings nas rim gyis 'chi med kyi grong khyer la co 'dri ba nyang stod kyi yul gru rnams zhabs kyis bcags nas shambhar du yab mes kyi chos skyong dpal mgon stag zhon nag po'i chos skor rnams gsan pas bstan dgra tshar gcod pa'i ltas mngon sum du bstan cing / rje 'di nyid la rgya zhang phrom/ drang nga kun grags/ chos dbang / ayon gling pa sogs kyi gter nas byon pa dang / jo bo chen po/ dpyal pa sogs las 'ongs pa'i stag zhon mtha' dag gi bka' babs pa'i be'u bum kyang dbang lung man ngag thams cad khungs btsun brgyud pa las nye bar 'ongs te yid brtan du gyur pa ma gtogs khungs med dang lung med kyi dpe hrul sdud pa'i zog spyod mkhan po rnams dang 'dra ba ni ma yin no/ /gsol 'debs las/ skyed tshal dgon par chos kyi sbyin pa mdzad/ smyug ri'i yang rtser rje btsun 'phrin las pas/ /'dzum zhal bstan zhing dgyes pas byin gyis brlabs/ /gsung gis rtses su bsngags la gsol ba 'debs/ /zhes pa lam yig las/ /de nub 'bras yul skyed tshal du sleb/ gra pa rnams shol rag chen po der lcog gra byas/ sger gyis mkhyen rab chos rje'i dbon/ nged kha'u brag rdzong pa'i gra rigs kun gyi gtsug rgyan rje brag dkar rab 'byams pa bzhugs pa'i gzims spyil du phyin nas mjal/ dad pa dang dag snang bsam gyis mi khyab pas zhal 'phros 'bel gtam 'ar ma 'ur ma byas skyed tshal ba'i gra pa sngags chos kyi 'dod zhen che ba mang dag la'ang rjes gnang rig