[A:288]gya nom pas mchod/ rtse gcig tu phyin ci ma log par sgrub pa'i mchod pas mnyes par mdzad de/ dam pa de dag kha cig gi ni yon tan yongs su rdzogs pa 'ga' las ni ji ltar 'tsham pa dang bcas pa gsan pa'i snyim pas ni ngom par gsol/ thos pa'i don thams cad la legs par bsam zhing / tshig dang don gyi cha phra mo tshun chod la las sla dang / shes lo'i dri mas ma gos par sgro 'dogs bcad de/ bla ma so so'i gsung gi snying po 'di'o/ /phyag len gyi rim pa 'di'o/ /bzhed pa'i mthar thug pa ni 'di'o/ /zhes re re nas ma 'dres pa yongs su rdzogs par thugs la mnga' ba yin no/ /mtshan nyid kun ldan yongs 'dzin bcu phrag gnyis/ /khyad par sku drin che ba'i dam pa bzhi/ /'gran med rtsa ba'i bla ma bdag chen rje/ /rnyed bkur sgrub pa'i mchod pas mnyes byas nas/ /'khrul med chos kyi sgo brgya phye ba las/ /smin grol bshad pa'i rin chen ring thang med/ /bgrang yas bdag gir mdzad khyod gangs can 'di'i/ /skal bzang skye bo'i dpal du chas pa bzhin/ /khyod kyi chos kun sgrib med gzigs bzhin du/ /mkhas rnams dga' ba'i dad dang tshul khrims kyis/ /slar yang legs bshad 'ba' zhig 'tshol mdzad pa'i/ /zab gsal blo gros mtshungs med 'di ngo mtshar/ /de ltar bdag cag gi dpal ldan bla ma dam pa 'dis zab pa dang rgya che ba'i chos tshul ji snyed pa zhig gsan te/ gsan pa de dag kyang ming tsam ma yin par tshul bzhin du bsam pa dang sgom pas thugs nyams su myong bar mdzad pa'i mthus/ gzhal du med pa'i yon tan gyi phung po la dbang 'byor pa yin mod kyi/ de'i mtha' 'di tsam