[A:350]bsam gyis mi khyab pa/ gdul bya so so'i bsam pa dang mthun pa lhug par stsal zhing zla ba gsum lhag pa zhig bzhugs/ gnas der gsang ba 'dus pa 'jam pa'i rdo rje'i sgrub mchod 'dzugs dgos pa'i bka' bkod dang / de'i thebs la dpon slob rnams kyis phul ba'i dngos po thogs pa yang 'jog par gnang / slar sbyin bdag chen pos gus pas spyan drangs te re zhig rdzong du sku mtshams la bzhugs/ ston bo dong bla brang du phebs nas sku mtshams bcad rgya'i khongs nas bla chen 'jam dbyangs dang / bdag cag la dbang gong ma gsum gyi lam la sogs pa rje nyid la mnga' ba'i gsung ngag rin po che'i skor mtha' dag sgrub pa lung byin pa'i bar du gnang / rje btsun dbon rin po che bsnyen par rdzogs pa'i las slob sogs rab byung bsnyen rdzogs mang po'i cho ga mdzad/ rje grub chen sangs rgyas dpal ba spyan drangs te/ bde mchog lu dril sogs bdag chen rdo rje 'chang nas brgyud pa'i dbang rjes gnang kha cig gsan/ lo de'i mjug nas khyi lo zla ba drug pa yan bla brang dkar po nyid dang / gtso bor bo dong rdzong du sku mtshams nges pa can kho na la bzhugs/ zla ba bdun pa'i nang du sAtstsha 'bum ther gsum bzhugs pa'i mchod rten khang bu brtsegs pa zhig la kye rdo rje ras bris la brten pa'i rab gnas rgyas pa zhig mdzad de/ ring bsrel bzhugs pa'i tshe/ phyogs rnams su byon zhing mdzad pa na/ nam mkha'i mthongs indra rnyil ltar dwangs shing nyi ma'i 'od gsal ba la/ mtha' thams cad char sprin gsar pas ched du gtibs pa lta bu/ de dag las gyes pa lta bu'i 'ja' kha dog lnga pa'i tshogs bsam gyis mi khyab pa mchod rten gyi thad du gdugs