[A:471] rje btsun rin po che'i zan 'bum bzhugs pa'i 'bum pa de tsho'i gseb na tshur rje btsun rin po che/ na bza' jus dkar po'i phod kha cig bsnams/ shing rta chung chung cig la chibs nas byon byung ba/ chos rje'i zhal snga nas kyang khag bzhengs te/ phyag 'tshal ba dang / byin rlabs zhus pa'i gsal ba ni ma byung / rje btsun gyi zhal nas/ da mi 'gro 'am gsungs/ de nas rje btsun stag byang chub sems dpa' mkha' spyod du gshegs pa'i phyogs de na yar gshegs song ba rmi/ da 'gro na'ang sems kyi 'khri ba sa skya'i dan stong de la chos khrims gtsang ma cig byung na snyam rtsol ba cher byas pa yin te/ de'i spros pa ni chod 'dug gzhan sems kyi lhag ma cung zad kyang med ces gsungs/ de lta bu la sogs pa dag pa'i snang ba 'ba' zhig snang tshod du 'dug go /de lta bu'i skabs su/ sku mdun na bzhugs pa rnams la/ sngon gyi lo rgyus dang 'phros gtam gyi tshul gyis bde bar gshegs nas thugs dgongs rdzogs par byed pa'i thabs dang / nang rten dang / phyi rten bde gshegs mchod rten brgyad bzhengs pa dang bzhengs lugs la sogs pa dang / gdung rus gdung thal dang bcas pa cung zad kyang ma 'khyar ba tsha tshar thebs pa gyis/ gzhan la rkyen sdug byung tsa na/ zong btang ba la sogs pa yong gin 'dug ste/ rang res de 'dra'i phyogs su ras kha gang yang gtong ma myong ba dang / yon bdag grwa pa dang bcas pa'i dkar po yang sngar gyi tshos chog pa yod pas/ da mchod spong dang zong cha len pa la sogs pa yang ma byed rab tu byung ba 'das pa'i rjes su mya ngan gyi cha lugs byed pa la sogs pa chos dang shin tu mi mthun pas/ de lta bu'i rigs gcig kyang ma byed gsungs pa la sogs pa'i zhal ta rab tu zhib pa mtha' chod par gnang 'dug /sa ga'i nyi shu gsum gyi nyin par bdag gis slebs pa na/