[A:468]su gyur pa/ bya bral ba dkon mchog rgyal mtshan gyis mtshungs med rje btsun dam pa dgung lo bdun cu don bzhi pa'i steng nas bzhugs pa/ shing mo phag gi lo tha skar gyi zla ba'i tshes bcu gsum la/ bas mtha'i ri khrod yang dben bsam gtan phug tu sbyar ba 'dis sems can thams cad kyi rgyud la bla ma'i byin rlabs 'jug par gyur cig /de ltar dgung lo bco lnga pa nas/ dgung lo bdun cu rtsa lnga'i bar du bstan pa'i bya ba 'ba' zhig gis dus 'da' bar mdzad la/ de yang dgung lo dgu pa la rab tu byung ba nas/ gdan gcig rdor dkar bsten te rang tshugs dam par mdzad pas sku lus shin tu nyam chung zhing / khyad par dgung lo nyi shu rtsa lnga pa'i tshe/ chos rje ye shes rgyal mtshan pa bsnyung ba dang / bde bar gshegs nas dang por bsnyung g.yog dang / phyis thugs dgongs rdzogs pa'i thabs yongs su rdzogs pa'i bar la/ gdan gcig gi gsol ba de yang ji lta ba bzhin ma byung bas/ lto ba rubs pa bzhin song ba yin pa 'dra/ dang ga yang mi bde ba rang cig byung gsungs/ phyis gsol dang cung zad bder song ba yin gsungs na'ang / sku gzugs shed la phan pa'i gsol ni mi bzhes par 'dug cing / zhib spol nyung zad re dang / la phug bzhin cung zad re ma gtogs bzhes pa mi 'ong ba cig 'dug /de'i stobs kyis dang po nas sku lus la shed med pa cig gda' na'ang / sku lus 'tsho sbyong ma mdzad par/ chos 'chad pa dang dbang bskur la sogs mdzad pa'i tshe/ dgun grang ba'i dus yin na'ang / dbang zhu mkhan rnams gos mang pos gtums nas 'dug kyang / grang ba'i snang ba chen po 'ong ba la/ rje'i zhal snga nas gzan chos sbrag ma'i thang rkyang re la dbang bskur ba dang dbang rdzas 'grims pa mdzad pas/ sku lus la shin tu gzan par 'dug cing / dbang grol ba'i tshe gsol ja tsam re yang bzhes rgyu med par dbang zhu mkhan rnams rang sar gyes 'gro ba dang / chos rje rin po che gzims khang