[A:442]'jug rnams rdzogs par gsan no/ /sku nas gzhon nu'i dus su sa skya na bzhugs pa'i dge ba'i bshes gnyen bzang ba phal che ba'i sku mdun du byon te/ grub mtha' dang phyag len la sogs pa'i dri ba dang / phyag dpe'i rigs su la ci 'dug gi rtog dpyod mdzad pa na/ zur khang pa'i dge ba'i bshes gnyen dge slong mgon po dpal zhes bya bas dkar logs na bzhugs pa cig yod pa na re/ sa skya pa'i chos legs po cig shes par 'dod na/ bla ma gong ma'i gsung rab la lta rtog legs po byed dgos pa yin zhes gsung bas/ de la thugs nges shes gting nas 'grongs te/ de shin tu bden/ ci nas kyang de lta bu cig bya dgos snyam du dgongs te/ /chos rje ye shes rgyal mtshan pa'i drung du yang / 'o skol kyi bla ma gong ma'i gsung rab 'di tsho dar ba cig byung na/ sa skya pa'i bstan pa la khyad che bar gda' ste/ zhes zhus pas/ de bzhin cis kyang byed pas/ khyed kyis kyang bla ma gong ma'i dpe cha gang na ci 'dug gi rtsad gcod legs po gyis shig gsung / khong pa rang gi sngar lo des rdor bsod kyi Ti ka'i steng nas brtag gnyis la thugs sbyong mdzad pa/ phyis dag ldan la bsgyur ba sogs bla ma gong ma'i gsung rab la gzigs rtog legs po mdzad nas bshad nyan gyis gtan la phab cing / dag ldan kha skong la sogs pa'i yig cha bzang po yang mdzad nas sa skya pa'i dge ba'i bshes gnyen mang po la gsungs pas/ thams cad la yang thugs skyed chen po byung / khyad par du yang chos rje'i 'di nyid de dus kyi gsan mkhan rnams kyi nang na/ sku nas gzhon shos yin kyang lhag par thugs bskyed che zhing tshig don thams cad la phul du phyin par thag chod pa yin no/ /rje'i zhal snga nas kyang / gong ma'i gsung rab kyi dpe cha'i rtsad gcod la thugs rtsol legs po mdzad nas/ dpe cha 'ga' re chos rje ye shes rgyal mtshan pa la yang gzigs pa phul/ chos rje pa rang gi gzigs rtog mthar phyin par mdzad pas gong ma'i gsung rab kyi dgongs pa dpyis phyin par thugs su chud de/ bla ma