[A:408]byed na mdo rgyud kyi pusti bslab dgos pas rgyud gsum 'di rang re brag phug pa'i pha chos yin pas slobs/ ngas bshad kyis gsungs nas gsungs pas lo phyed dang gnyis tsam nas yongs su rdzogs te/ mdor na brag phug pa nas brgyud pa'i bka' lung man ngag byin rlabs la sogs pa chos rje nyid la bzhugs pa thams cad bum pa gang byo'i tshul du rdzogs par gnang ste/ dgung lo bcu gsum pa nas nyi shu rtsa gnyis kyi bar du na bza' brag phug tu bzhugs so/ /nyi shu rtsa gcig pa la chos rje bla ma dam pa'i drung nas mkhan po zhus/ chos rje ri khrod pa slob dpon/ drung dkon mchog rgyal ba gsang ste ston pa/ 'dul chung mkhan po rgyal bzang bas grib tshod mdzad de/ dad pa'i dge 'dun bcu phrag lhag gcig gi dbus su/ na bza' brag phug gi gzims khang du bsnyen par rdzogs par mdzad do/ /dgung lo rtsa gsum pa la byang chub rdzong du byon nas lo gsum gyi bar du sgrub par mdzad/ dgung lo nyi shu rtsa drug pa la/ chos rje'i gsung gis gong ma'i phyag dpe thugs dam/ lha rten 'di pa zung la gzims khang 'di la chos rje pa thugs zhen chen po mdzad/ dge sbyor 'phel po 'ong ba'i gnas yin pas/ nyid kyis nga ji ltar byed pa bzhin gyis la bla ma gyis/ dge slong rin rgyal gyis nye gnas gyis la sgrub pa la nan tan du gyis gsungs/ de nas chos rje ri khrod pa gnas de nyid du zhi bar gshegs/ de rjes gshegs brdzongs dang / nang rten la sogs pa thugs dgongs rdzogs pa'i thabs rnams legs par mdzad nas zhal ta bzhin byang chub rdzong du thugs dam kho na la bzhugs pas nyams rtogs shin tu 'phel ba byung gsungs/ dgung lo sum cu so bzhi pa'i dus su/ zha lu ri phug tu bu ston rin po che'i drung du byon nas/ yo ga'i skor gyi dbang dang / gshed dmar gsang 'dus la sogs pa'i dbang bka' mang po dang / gsang 'dus rim lnga/ shin tu spros med la sogs pa