[A:388]mgon po 'jam pa'i dbyangs kyis byin gyis brlabs pa/ lha dang bcas pa'i gtsug rgyan du gyur pa 'ba' zhig yin la/ chos rje 'di nyid kyang mkhas grub du mas byin gyis brlabs shing brten pa'i chos grwa chen po dpal ldan sa skya'i gdan sa de nyid du 'khon gyi gdung rabs dri ma med pa'i rigs yab bdag nyid chen po dgung lo lnga bcu bzhes pa dang / yum sde chen po zha lu'i gtsug lag khang chen po sku zhang mgon po dpal gyi sras mo jo mo lugs skyes rab tu byung ba'i mtshan gzhon nu 'bum lo nyer bdun lon pa'i tshe/ chos rje 'di lhums su 'jug pa ni yum gyi rmi lam du/ nyi ma'i 'od zer rgyas pa lto bar zhugs pa dang / g.yas ru gtsang po dus gcig la 'thungs pa dang / chu de la mi mang po brgal bar chas pas/ de rnams chu la sgrol bar rtsom pa rmis te/ bo dong e'i bla ma 'khon ston pa la zhus pas khyed la sras sangs rgyas kyi bstan pa'i gsal byed chen po zhig gam/ yang na stobs kyi 'khor los sgyur ba'i rgyal po lta bu bsod nams dang ldan pa cig bltams pa'i ltas yin zhes lung bstan/ chu pho byi ba'i lo sa ga zla ba'i tshes brgyad kyi snga dro rin chen sgang gi bla brang gong mar sku 'khrungs/ de'i tshe sa g.yo ba dang / nam mkha' la 'ja' tshon 'khrigs pa/ kha'u gtsang ngo cher rgyas pa la sogs pa dge legs kyi ltas mang du byung bas mi thams cad jo mo'i sras 'khrungs pa'i ltas a la la zhes dga' zhing ngo mtshar bar gyur to/ /mtshan yang rmi ltas dang mthun par nyi ma bde ba'i blo gros zhes btags so/ /bla chen ti shrI kun dga' blo gros la sogs pa yab gcig yum mi gcig pa'i sku mched dgu 'khrungs pa'i mtha' ltag ni chos rje nyid yin no/ /sras de gso ba'i ma ma kun dga' skyid ces pa la gtad de bskyed bsrings te/ rang bzhin gyis yid du 'ong ba/ gzugs mdzes shing blta na sdug pa/ kun gyi yid du 'ong ba/ rang bzhin gyis spyod pa dang ngang tshul bzang ba/