[A:༡༨༥བ]ལྷ་ཁང་ཆེན་མོ་བཞེངས། ཁྲི་སྐོར་བཅུ་གསུམ་བསྐུལ། དཔོན་ཆེན་ཀུན་དགའ་བཟང་པོ་དང་སྦྲེལ་ནས་རྫོགས་པར་གྲུབ། རིན་ཆེན་སྒང་། ལྷ་ཁང་བླ་བྲང་། དུས་མཆོད་བླ་བྲང་རྣམས་ཀྱང་བཞེངས་སོ། །གོང་དུ་ཕེབས་ནས་དགུང་ལོ་སོ་དྲུག་པ་ལྕགས་ཕོ་རྟ་ལ་དབང་ཞུས་པའི་ཚེ། མེ་ཉག་རྒྱ་རྒོད་ཀྱི་རྒྱལ་པོའི་ཤེལ་དམ་ལ་བཅོས་བྱས་ནས། ཤེལ་དམ་གླིང་དྲུག་མ་དང་། མུ་ཏིག་གི་འཇའ་ས་ཕུལ། གནམ་གྱི་འོག སའི་སྟེང་ན་རྒྱ་གར་ལྷའི་སྲས་པོ། སྤྲུལ་པའི་སངས་རྒྱས། ཡི་གེ་རྩོམ་མི། རྒྱལ་ཁམས་འཇགས་སུ་འཇུག་པ་པོ། གནས་ལྔ་རིག་པའི་པཎྜི་ཏ་འཕགས་པ་ཏི་ཤྲཱི་ཞེས་མཚན་གསོལ། དངུལ་བྲེ་ཆེན་སྟོང་ར་ཅན་དང་། གོས་དར་ལྔ་ཁྲི་དགུ་སྟོང་ལ་སོགས་པ་ཕུལ། མཇལ་རེས་ཀྱིས་མཐོང་ཕྱག་དང་མཇལ་དར་དངུལ་བྲེ་འཆག་མེད་སོགས་མཛད་པས། རྒྱལ་པོའི་འཕྲལ་གྱི་འབུལ་བ་ཀུན་དྲིལ་བས་གསེར་བྲེ་བརྒྱ་ལྷག དངུལ་བྲེ་སྟོང་ར་ཅན། གོས་དར་བཞི་ཁྲི་ལ་སོགས་པ་