[A:༡༦༢བ]འཆར་ཁ། ཟངས་གདོང་རུ་ཁྲོད་རྣམས་སུ་གདུལ་བྱ་མང་པོ་ལ་ལམ་འབྲས་གསུངས་པ་གསུམ། གུང་ཐང་དུ་བླ་མ་མལ་གྱི་དྲུང་དུ་དྲིལ་བུ་ཆོས་སྐོར་གསན་པ། ཤབ་སྒོ་ལྔར་ཆོས་འཁོར་བསྐོར་བ། འབྲིང་མཚམས་མགྲོན་ལྷ་ལྕམ་གྱི་ལྷ་ཁང་ལ་རབ་གནས་མཛད་པ་རྣམས་དུས་ཚོད་ཚེས་གྲངས་གཅིག་ལ་མཛད། སྐུ་གཤེགས་དུས་ཀྱང་སྐུའི་བཀོད་པ་བཞི་བསྟན་ཏེ། གཅིག་བདེ་བ་ཅན། གཅིག་པོ་ཏ་ལ། གཅིག་ཨུ་རྒྱན། གཅིག་གསེར་མདོག་ཅན་དུ་གཤེགས། སྤུར་བཞུ་དུས་ཀུན་གྱིས་ཡི་དམ་ཞལ་བཞི་པར་མཐོང་། ལ་ལས་བརྒྱད་པར་མཐོང་བ་ཡང་བསྟན་པ་སོགས་གྲུབ་རྟགས་བསམ་གྱིས་མི་ཁྱབ་བོ། །གཞན་དོན་ལ་སྐུ་དངོས་ཀྱི་གདུལ་བྱ་བླ་མ་དགེ་ཆུ་བ་ལ་དབང་གསན་པའི་སྟ་གོན་གྱི་མནལ་ལམ་དང་མཐུན་པར། ཞང་སྟོན་མངའ་བརྙེས་ཆོས་འབར་གྱིས་གསུང་ངག་མཐའ་དག་རྫོགས་པའི་མཇུག་ཏུ་ལུང་བསྟན་མཛད་པ་བཞིན། ལུས་མ་སྤངས་པར་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ་གསུམ།