[A:99a]bkod/ ma gshin tshogs kyi dkyil 'khor zhal phye nas sgrub pa'i tshe/ baM la ye shes sems dpa' zhugs te dngos su bzhengs pa ro langs bde ba'i dngos grub yin/ dus kyi mtha' la de lta bu'i rig 'dzin chen po zhig 'byung zer ro/ /klu sgrub las padma sambhas gsan pa rta mgrin/ dga' rab rdo rje/ 'jam dpal bshes gnyen/ hU~M ka ra/ yang dag padma sambha la rdo rje phur pa/ 'di la slob dpon klu sgrub/ thogs med/ ro langs bde ba rnams kyi gzhung yod ces rgya gar gyi slob dpon bde byed zer ro/ /dha na saMkr-i ta'am padma nag po la ma mo/ shAntiM garbha la 'jig rten/ bi ma la la bdud rtsi zhes 'dren la/ slob dpon so sos mdzad pa'i de dag gi yi ge'i rigs kyang mang ngo / /padma sambhas rig 'dzin gzhan rnams la'ang gsan no/ /gter ma'i lo rgyus la ni/ ston pa kun tu bzang pos dgongs par bzhugs/ rgyal ba'i bzhed pa thams cad gcig tu bsgril nas khro bo'i dkyil 'khor chen por mngon sum bstan te/ 'jig rten pa dang 'jig rten las 'das pa'i 'khor dang ma 'ongs pa'i gdul bya 'dul ba'i phyir/ rig 'dzin rdo rje chos kyis bsdus te rgyud lung man ngag tu phye nas glegs bam du byas/ /mkha' 'gro ma rnams dang lha ma srin sde brgyad la gtad do/ /de nas mkha' 'gro ma dang sde brgyad rnams kyis che mchog gi rgyud lung man ngag gser gyi sgrom bur bcug yang dag dngul gyi sgrom bur/ gshin rje lcags kyi sgrom bur/ padma zangs kyi sgrom bur/ phur bu g.yu'i sgrom bur/ drag sngags gza'i sgrom bur/ ma mo bse'i sgrom bur/ 'jig rten mchong gi sgrom bur/ rin po che sna brgyad la byas pa'i sgrom bur bka' spyi dril bcug gar sba ba bgros pas ma 'cham/ der mkha' 'gro las kyi dbang mo che byon nas/ dur khrod chen po bsil ba'i tshal gyi mchod rten bde byed brtsegs pa'i nang du sbos shig gsung ba bzhin byas thams cad kyis mchod do/ /de nas ring zhig na slob dpon chen po brgyad dgongs pa la bzhugs pa mthun pa'i gzigs snang la/ dur khrod chen po de na nyin par rlung dang 'tshub ma/ thog dang ser ba 'bab/ mtshan 'od dang mer 'bar/ glog 'khyug pa'i cho 'phrul sna tshogs byung bas/ rig 'dzin brgyad bka'