[A:95a]bzang po/ rdo rje bde ba chen po'o/ /bco brgyad kyi nang du dman pa zhabs kyang gtogs la/ des zhal lung gi 'grel pa'ang byas so// // ! da ni rgya gar shar phyogs su dar ba'i tshul ni/ rgya gar shar phyogs za hor gyi rgyal khams na bhangga la zhes bya ba'i pho brang phun sum tshogs pa de na/ rgyal po dza/ gzhan las rab gsal zla ba'am zla ba'i go cha zhes kyang zer la/ 'ga' zhig las rgyal po tsa zhes kyang 'byung ste/ tsa dang dza yul dus las skad kyi 'gyur bar zad do/ /rgyal po de rdo rje theg pa'i skal ba bzang po dang ldan pa'i phyir de'i pho brang gi yang steng su glegs bam gyi char chen po babs pa kha phye ste bltas pas don ma 'tshal la/ yul de'i phyi nang ni mkhas pa dag la bstan kyang go bar ma gyur nas/ rgyal pos mchod de lha khang du bzhugs su gsol ba/ 'di dag gi don 'tshal ba zhig byung na ci ma rung snyam pa na rmi lam du yul dbus na khyi'i slob dpon ku ku ra tsa zhes bya ba yod kyi/ des ston par 'gyur ro zhes rmis nas/ sad 'phral la slob dpon de spyan drangs ba'i pho nya brdzangs so/ /slob dpon yang ngo mtshar nas/ gal te bdag gis shes par gyur na legs mod kyang / ma 'tshal na ngo tsha bar 'gyur ro snyam nas glegs bam 'ga' zhig skur zhig smras te pho nya slar slog pa dang / des rgyal po la gsol/ des de bzhin du byas te glegs bam 'ongs pa dag slob dpon la sprad pas kha phye ste gzigs pa na ci yang ma go nas dbu brdabs de nga bslus nga bslus so zhes dud mo phyung bas/ dpal rdo rje sems dpa' mngon sum du byon zhes kyang zer la/ gzhan de nas slar bltas pas rdo rje sems dpa' zhal mthong gi sgrub thabs shes nas bsgrubs pas grub ste/ thams cad 'chad nus par gnang ba thob nas za hor du gshegs te rgyal po 'khor dang bcas pa la bshad do/ /de nas rgyal po des dpal mchog dang po las gsungs pa bzhin gyi chags chen gyi spyod pa mdzad de 'khor dang bcas pa dkyil 'khor gyi 'khor lor bkod/ 'dod yon lnga lam du byas pa grub ste/ rgyal sa sras mos bskyangs/ de'i mtshan go ma de wi'o de dang slob ma sgra gcan 'dzin bzang po/ su bhU ti