[A:91a]ci gsungs pa bzhin bgyid do/ /'o na sangs rgyas kyi sku bzhugs pa'i lha khang bzhengs/ de'i sgo gong du nga'i gzugs shig gyis/ dge 'dun gyi sde tshugs/ dge 'dun brgya phrag gi 'tsho ba sbyor/ mchod pa byed pa'i dus dang por sangs rgyas kyi rten/ de nas nga'i gzugs/ de nas khyod rang gi rten la ra dang ma he la sogs pa srog chags mi gsod par 'bras chan la sogs pa'i mchod pa byed na khyod rlag par mi byed/ de ltar mi byed na khyod rlag par byed do gsungs pas/ kho na re/ sangs rgyas kyi bstan pa 'gribs shing 'gro bas da lta dge 'dun gyi sde btsugs kyang myur du 'jig 'gro /mchod mkhan mi 'ong / nga la mchod pa byed pa mang po yod pas/ de'i phyed slob dpon la 'bul/ bstan pa gnas kyi bar du nga'i 'dir bzhugs nas mchod gnas mdzad dgos zer bas/ slob dpon gyis de ltar zhal gyis bzhes/ khos dge 'dun gyi sde btsugs/ slob dpon gyi sku bzhengs/ phyi pa thams cad kyis dang por slob dpon la mchod/ de nas dbang phyug la mchod par byed/ slob dpon yang b.ratal zhugs kyi spyod pa byed 'phro bcad nas rdo sku de nyid la thim zhes grags la/ nag po pa'i ngor lam 'bras rdo rje'i tshig rkang brtsams des yul dbus su 'khrungs pa DA ma ru pa/ des a wa dhU tI pa/ des ga ya dha ra'o/ /Dombi wa de u rgyan du byon/ bcom ldan 'das bdag med mas dngos su byin gyis brlabs te gsang ba byin pa/ der chang 'tshong ma zhig la chang nyo gsungs pas/ rin ci yod zer/ nyi ma gta' mar bcug ste yul khams de'i chang zad kyi bar 'thungs pa'i tshul sngar dang 'dra la/ rgyal po 'khor bcas dad pa mdzad cing chang 'tshong ma de skal ba dang ldan par gzigs nas rjes su gzung bas/ rnal 'byor ma bi na sa badzwa zhes grags so/ /de nas shar phyogs rgyal po dhe ha ra'i rgyal khams su gshegs te kaM ka'i grong zhes pa'i tshong 'dus su stag la ni zhon/ dug sbrul gyis ni rgyan byas/ rigs ngan gyi bu mo pang du bcangs te yul de'i skye bo thams cad dad par byas pas Dombi he ru ka zhes grags la/ mi phyugs thams cad mkha' spyod du song ngo / /