[A:87a]drug gi rtogs pa shar ro/ /sngar mi 'tsham pa byung nas thugs mug pa de ting nge 'dzin gyi drod rtags yin par mkhyen/ de lta bu'i rtogs pa skyong zhing rang gi brang khang na bzhugs pa la grwa pas dus khyad par can gyi mchod pa'i yo byad la sha chang khyer te 'gro ba mthong nas/ sgo gseng las bltas pas bud med bco lnga dang lhan cig 'dug go /dge 'dun bgros nas gnas nas phyung ngo / /der bdag nyid kyis kyang ngan par zhal gyis bzhes pas mtshan bi rU pAkShar thogs/ de nas wA rA Na sI'i rgyal po mu stegs la dad pa 'dul bar gshegs nas ganggA'i 'gram du phebs pa dang / nga ngan pa yin pas chu la reg tu mi btub pas chu khyod kyis lam phye zhig ces brjod pas chu bo gyen la log ste gram pa skam shar gyis byung ba la gshegs pas/ dge 'dun gyis grub pa thob par shes nas bzod par gsol/ wA rA Na sIr lo gcig ting nge 'dzin la bzhugs pas sku nyi lhags kyis gdungs pas sngo skya 'jigs su rung bar gyur/ der mu stegs pa'am sangs rgyas pa the tshom nas/ rgyal po gho nanta tsakra bya ba des mu stegs yin na 'o rgyal te 'ong pas nang du spyan 'dren/ sangs rgyas pa yin na wA rA Na sIr gnod pa bskyal dogs yod pas bskrad dgos pas rtogs shig zer/ brtags pas ma rtogs te/ rgyal po'i drung du khrid la shog zer khrid nas yongs ba'i lam du 'bu dang phye ma leb la sogs pa'i srog chags mang po khar bcug pas mi rnams na re ngan pa zer/ kha nas gsos te spur bas kyang ngan pa zer ba la/ slob dpon gyis/ srog chags mang po bsad kyang ngan pa zer/ srog chags mang po gsos kyang ngan pa zer/ bdag gis ji ltar bya ba ma shes sogs gsungs/ rgyal po'i drung du sleb pa dang / rgyal pos phyi nang gang yin dris kyang lan ma btab/ rgyal pos 'di la dbang phyug gi rtags gang yang mi 'dug pas lcags su chug la chu la skyur cig de ltar byas pas lcags sgrog chad nas rgyal po'i rtsar slebs/ yang yang byas kyang de ltar gyur pas/ rgyal pos grub thob tu shes nas bzod par gsol te 'khor dang bcas pa sangs rgyas par byas so/ /de nas lho phyogs bi ma ha ra 'dul bar gshegs pa'i lam ganggAr ko mkhan la sgrol