[A:75a]bud med dum gcig skye ba bdun pa'i ro gcig mdun du bzhag ste sgeg cing rol pa'i cha byad du 'dug pa la phyag dang mchod pa byas/ de rnams kyis zhal nas dam tshig gi rdzas de chod la nged rnams la drongs/ kha na ma tho ba med pa nyon mongs pa dang ma 'dres pa'i zas yin pas khyod rang kham gcig zo gsungs nas/ tsham tshom med par zos pas/ de rnams shin tu mnyes nas/ 'khor lo sdom pa'i dkyil 'khor du song nas/ der slob dpon bcug dbang bskur/ rang byin gyis brlabs pa'i nyams myong gi bde ba mtshon byed dpe'i ye shes rgyud la skyes nas/ de nyid brtan zhing bogs dbyung pa'i phyir gdams pa dang / rjes su bstan pa yang mdzad nas tshe 'di nyid la mchog gi dngos grub mtshon bya don gyi ye shes myur du rtogs pa'i phyir bskul ba'i tshig rkang pa brgyad pa spangs nas ni/ /'khor ba'i mngag gzhug dor nas su/ /rdo rje sems dpa' rgyal po che/ /yang dang yang du bskul bar bya/ /zhes gsungs nas mi snang bar gyur to/ /de'i don bsams pas sgrub pa la rtse gcig tu 'bad dgos par dgongs nas bhangga lar byon/ 'tsho ba gang la rten snyam pa dang / bsod snyoms la sogs pa ni rnam par g.yeng / shing thog la sogs pa ni dgun dkon/ nya pa mang pos nya bsad nas lto'i phung po chen po spungs nas de la bya dang khyi za zhing 'dug pas/ bdag med cing rtsol ba chung bar gzigs nas/ de'i phyogs gcig tu bzhugs/ 'tsho ba nya lto yis mdzad cing rtse gcig tu nyams su blangs pas phyag rgya chen po mchog gi dngos grub brnyes gsol zas las mtshan du thogs pa lU yi pa zhes grags so/ /de nas rgya gar lho phyogs dang nye ba o Di bi sha'i yul grong khyer ku mA ra kShe tra gzhon nu ma'i zhing zhes bya ba rgyal po bi ma la tsandra zhes bya ba rgyal srid kyi 'byor pa bdun dang ldan pa zhig yod pa de 'dul ba'i dus la bab par gzigs nas der byon pa dang / rgyal po de skyed mos tshal du me tog ku mu ta'i dga' ston la 'byon pa la/ grong khyer pa rnams kyis lam dang srang bar thams cad phyag bdar byas/ dri zhim po'i chus chag chag btab/ me tog sna tshogs gcal du bkram/ skyed tshal du rin po che sna tshogs kyi khri bshams pa la slob dpon smyon pa'i cha byad kyis bzhugs so/ /de'i tshe rgyal po dpung dang bcas pa byon pa'i sngon du/ mdun na 'don rta pa sum cu rtsa