[A:65a]zhes bya ba la bu mo rol pa mo zhes pa thams cad kyi yid 'phrog pa/ gus pa dang zhi dul dang ldan pa btsun po zhig skyes pa de 'khor bu mo lnga brgya dang bcas pa nags su me tog 'thur phyin pa na/ bu mo'i 'khor rnams kyis drang srong de mthong ste 'jigs nas 'di na gnod sbyin 'dug go zhes smras te bros pa na/ rol pa mo dang phrad pas/ de na re 'di ni u rgyan rdo rje mchog chen po'i gnas te/ 'di na ni bar du gcod pa'am glags lta ba'i 'byung po su'ang rung ba gnas par nus pa ma yin na/ de ni byang chub sems dpa' su zhig skal ba dang ldan pa rjes su gzung ba la sprul pa'i skur bstan pa zhig go snyam nas 'khor rnams khrid de phyogs der song ngo / /der sleb pa dang drang srong de mthong bas yid dga' zhing spu zing zhes byed nas/ de la btud pas/ de na re/ kho bo ni gnod sbyin no/ /yang dag pa'i gnod sbyin no/ /zhes gsungs nas/ bu mo'i mgor phyag bzhag nas dran par gyur tam dran par gyur tam zhes gsungs pas/ sngon de bzhin gshegs pa thams cad kyis gsang ba'i dkyil 'khor du dbang bskur ba'i slob dpon gsang ba'i bdag po yin par mthong la/ des byin gyis brlabs pas 'khor dang bcas pa phyag rgya chen po mchog gi dngos grub mngon sum du mdzad do/ /'di'i mtshan su ma ti blo gros bzang mo zhes bya'o/ /sa ra ha'i bla ma klu las gyur pa'i rnal 'byor ma'ang de kha dpe phal mo cher skal ba bzang mo zhes bkod do/ /de nas yang ci zhig na rgyal po dpa' bo rdo rje zhes bya ba yul der byung la/ mchog gi dngos grub tshe gcig la grub pa'i snod du gzigs nas/ bu mo rol pa mo 'khor lnga brgya dang bcas pa gdol pa mo'i gzugs su byas nas rgyal po de'i pho brang du slong bar 'ongs so/ /de dag sleb pa tsam na pho brang gi 'khor de thams cad dri bzang pos gang / de dag song ba na mi snang ngo / /der rgyal pos mtshan ma 'di las ni/ u rgyan gyi yul 'di na rgyal po'i bu mo rol pa mo 'khor lnga brgya dang bcas pa rnal 'byor gyi spyod pa skyong zhing skal pa dang ldan pa rnams rjes su 'dzin par mdzad do zhes grags pa de yin pa/ gor ma chag snyam nas slar bos pa dang / de dag gis nyin mi 'ong mtshan mo 'byon pa'i brda mdzad nas/ mtshan mo 'dus te tshogs kyi mchod pa chen po byas nas rgyal po la rjes su gdams pas/ des dngos grub chen po brnyes so/ /des mdun na 'don dam tshig rdo rje/ des shing tshong pa padma'i rdo rje/ des chang tshong pa lhan cig skyes pa'i rdo rje/ des tha ga pa dga' ba'i rdo rje/ des bram ze mo rdo rje/ des breg mkhan grub pa'i rdo rje/ des rnal