[A:64a]thar pa'i thabs bshad du gsol ces zhus so/ /bcom ldan 'das kyis mkhyen bzhin du khyim nas khyim med par rab tu byung zhig dang thabs yod do zhes bka' stsal to/ /rgyal pos slar yang mchod nas bdag cag la sogs pa'i skye bo 'dod chags can rnams kyis 'dod yon lnga spong bar mi nus pas/ de ma spangs par thar pa'i thabs bshad du gsol ces zhus so/ /der bcom ldan 'das kyis chags bral gyi snang ba bsdus nas 'khor lo sgyur ba'i gzugs kyis gsang ba 'dus pa mi bskyod pa'i dkyil 'khor lha sum cu rtsa gnyis kyi bdag nyid can du sprul te/ rgyal po 'khor dang bcas pa la dbang bskur/ rgyud bshad cing gtad do/ /rgyal pos de'i don khong du chud nas rin po che sna bdun gyi gzhal yas khang bgyis te/ gtso bo'i gnas su rgyal po rang nyid dang / sangs rgyas bzhi yum bzhi'i gnas su sras dang btsun mo/ sems dpa' sems ma'i gnas su blon po/ khro bo'i gnas su mngag gzhug bkod de/ nyon mongs pa lam du byed pa'i spros bcas kyi spyod pa chen po brtsams pa ci zhig na grub ste/ 'khor dang bcas pas snyigs ma'i lus sbrul gyi pags pa bzhin brjes nas 'ja' tshon gyis mtshon pa'i skur gyur te sangs rgyas kyi zhing nas sangs rgyas kyi zhing du mi slob pa'i zung 'jug rdzogs par bya ba'i phyir rgyu'o/ /des u rgyan gyi yul stongs pa dang / de'i lho phyogs na mtsho gcig yod pa 'phel te klu mang po dang bcas pas yul de gang bar gyur to/ /de nas phyag na rdo rjes dpal gsang ba 'dus pa la sogs pa'i rgyud rnams gser gyi glegs bam la bai DUrYa zhun mas bris te mtsho de'i klu rnams smin par mdzad nas rgyud bshad cing glegs bam gtad do/ /de nas de rnams phal cher mir gyur te mtsho 'gram du grong khyer bcas te gnas/ thabs rgyud kyi don nyams su blangs pas phal mo che thun mong dang mchog gi dngos grub thob/ de dag gi bu rnams ni rnal 'byor pa dang / bu mo rnams mkha' 'gro mar gyur to/ /de nas dpal u rgyan mkha' 'gro'i gnas zhes ding sang gi bar du grags so/ /klu gzhan dag ni mi'i dri nga ba tshor bas mtsho gzhan du song ngo / /de nas phyi zhig na mtsho de bskams te dpal he ru ka'i lha khang rang byung phun sum tshogs pa zhig kyang byung nas/ /rgyud kyi glegs bam rnams kyang de'i dkor mdzod du bzhugs so/ /de nas mi ring bar phyag na rdo rje'i sprul pa drang srong dbugs 'byin zhes bya ba skal pa dang ldan pa rnams la lhan cig skyes pa'i rin po che'i man ngag gi rgyud bstan par bya ba'i ched du bzhugs par gyur te/ dus de'i tshe na yul de'i rgyal po mthong na dga'