[A:62a]dbang phyug byed pa po/ 'jig pa po/ 'byung ba po/ thams cad kyi dbang po/ lha'i yang lha chen po yin na/ gnod sbyin khyod kyi ngag ci'i phyir nyan zhes mi 'dud pa la/ sangs rgyas rnams kyis de'i bka' bzhin du byos shig ces gdams kyang / lha dbang phyug chen pos/ 'jig rten gsum po mtha' dag dang / nam mkha'i khams rnams khro ba khro bo chen pos non par byin gyis brlabs te/ 'di skad ces smras so/ /khyod kyang nga'i bka' la nyon la/ dam tshig kyang longs shig de nas phyag na rdo rjes hU~M zhes brjod pas/ 'jig rten gsum po'i dbang po thams cad kha sbub tu 'gyel te/ nyam thag pa'i tshig 'byin zhing bcom ldan 'das la skyabs su song ngo / /lha chen po zhes bya ba'i lha de ni sa la 'gyel te dran pa med par gyur nas shi'o/ /gzhan rnams dbugs phyung ste bka' sdod du bzhag lha chen po shi ba las gsos te ldang 'dod na'ang ldang ma nus pas/ bcom ldan 'das la bskyabs pas/ de nyid la skyobs shig bdag cag gis mi nus so/ /de nas phyag na rdo rjes lha chen po 'bod de 'di skad ces gsungs so/ /kye ma rungs pa nga'i bka' mi nyan nam/ de nas lha chen pos/ rdo rje sems dpa'i tshig thos nas 'khrugs shing khros par gyur te/ de ltar 'gyel bzhin du yang 'jigs pa chen po'i gzugs bstan te/ 'di skad ces smras so/ /nga shi bar bzod kyi/ khyod kyi ngag mi nyan no/ /de nas phyag na rdo rje rab tu khros te lha chen po zhabs g.yon pas mnan/ zhabs g.yas pas lha mo u ma mnan pas de ma thag tu lha chen babs nas rang gi lag stong gis rang gi gdong stong la 'tshog go /de'i tshe khang bu brtsegs pa'i phyi rol na srid pa gsum po thams cad kyis/ nged kyi dbang po 'di bdag nyid chen po des btul lo zhes pa'i sgra chen po byung ngo / /de nas lha chen po bcom ldan 'das phyag na rdo rje'i zhabs mthil gyis reg pas/ de bzhin gshegs pa thams cad kyi ting nge 'dzin dang / gzungs dang / rnam par thar pa'i bde ba myong ste/ lha chen pos lus phyag na rdo rje'i zhabs la phul nas/ 'og gi 'jig rten gyi khams ganggA'i