[A:61a]skyes bskur res byas/ kong jo yang de'i sras mo yin zer ro/ /'di'i ring la lo tsA ba thang san dzang zhes pa byung nas chos mang po bsgyur/ de yan chad la rgya'i lo tsA ba nyis brgya byung / thang rus pa'i ming / zan sde snod de sde snod gsum pa ste/ rgya gar gyi slob dpon dbyig gnyen gyi slob ma yin zer ro// // ! gnyis pa 'bras bu'i theg pa ji ltar dar ba'i tshul la/ 'dzam bu'i gling du gsang sngags dar tshul/ bod kyi bstan pa'i 'byung tshul gnyis so/ /dang po ni/ de'i tshe byang chub sems dpa' sems dpa' chen po kun tu bzang po zhes bya ba 'jig rten gyi khams me tog gi gzhi'i snying po'i rgyan bkod pa 'di thams cad du/ bcom ldan 'das rnam par snang mdzad kyi sngon gyi spyod pa bstan par smon lam btab nas/ gnod sbyin 'dul ba'i dbang nye bar bzung ste/ dbus kyi 'dzam bu'i gling mi mjed 'di'i lcang lo can du gnod sbyin gyi sde dpon chen po 'brog gnas kyi gnas na sprul pa'i skur bstan te sangs rgyas kyi bstan pa skyong ngo / /lhag par bcom ldan 'das 'og min dbang bsgyur gyi gzhal med khang du rdo rje dbyings kyi dkyil 'khor du dbang bskur te mngon par sangs rgyas pa'i tshe/ lha chen po la sogs pa ma rungs pa'i sems can de bzhin gshegs pa thams cad kyis zhi bar mdzad kyang / sdig pa las ma ldog pa de dag tshar bcad pa'i phyir byin gyis brlabs pas/ de bzhin gshegs pa thams cad kyi gsang ba'i bdag po zhes bya/ dus de'i tshe sangs rgyas thams cad kyi grub pa'i rdo rje phyag tu gtad pas phyag na rdo rje'am/ rdo rje 'dzin pa/ des dus der 'jig rten gsum gyi dbang po dbang phyug chen po la sogs pa 'jig rten thams cad la gnas pa'i tshogs kyis bskor ba/ ma lus shing lus pa med pa rnams de bzhin gshegs pa thams cad kyi dam tshig gi rdo rje'i lcags kyus bkug nas/ ri rab ri'i rtse mo/ rdo rje dang / nor bu dang / rin po che las byas pa'i khang pa brtsegs pa gang na ba der lhags nas thams cad du bskor nas 'khod par gyur to/ /de'i tshe phyag na rdo rjes rdo rje gsor zhing 'khor gyi dkyil 'khor la bltas nas/ grogs po rnams de bzhin gshegs pa rnams kyi bstan pa la zhugs la/ nga'i bka' yang nyon cig de dag cher khros pas 'jig rten gsum po mtha' dag gi