[A:43a]thams cad the tshom du gyur to/ /gnangs snga dro dkyil 'khor bris te shar sgo tsam zin pa na/ slob dpon gyis ting nge 'dzin mdzad pas 'tshub ma chen po langs te rmeg med du khyer/ shing dang grong khyer thams cad kyang 'gyel la thug par ldeg der tshogs pa'i mi rnams kyang bdas/ mu stegs kyi ston pa'ang rnam par 'thor/ phyogs thams cad mun pa chen por gyur to/ /de nas slob dpon gyi smin mtshams nas 'od byung ste rgyal po dang btsun mo lam bstan te/ gos dang bral zhing rdul gyis g.yogs pa la chus bkrus ras gsar pa g.yogs te mes bsros te bde bar byas so/ /de nas mu stegs kyi lha khang rnams bshig nas sangs rgyas kyi bstan pa la btsud pas da lta'i bar du'ang yul de la mu stegs pham pa'i yul zhes grags so/ /de lta bu'i slob dpon rnams la gzhung phyi mo'i dbu ma pa zhes 'dod la/ yum shes rab kyi pha rol tu phyin ma'i dngos bstan lhag pa'i shes rab rnam par 'grel ba rtsa ba shes rab slob dpon chen po sangs rgyas bskyangs kyis klu sgrub nyid las thos pa bzhin 'grel pa mdzad/ de nas ring zhig na mkhas pa chen po legs ldan 'byed rang nyid rtog ge la mkhas pa ston par bzhed la/ de ltar bshad pas dbu ma'i don yang mi nyams par dgongs nas sangs rgyas bskyangs kyis mdzad pa'i 'grel pa la gzigs nas/ de la zur za ba'i 'grel pa shes rab sgron me zhes bya ba brtsams/ bod kyi bgres po dag slob dpon sangs rgyas bskyangs dang legs ldan dngos su rtsod pa mdzad pas/ sangs rgyas bskyangs kyis legs ldan 'byed ma thub par skye bar phyi mar de las rgyal bar smon lam btab ste zla ba grags par 'khrungs/ de'i tshe legs ldan 'byed dang gnyis rtsod pas zla grags rgyal/ legs ldan 'byed de'i slob mar zhugs so zer ba ni gtan mi 'thad de/ tshig gsal las/ sangs rgyas bskyangs kyis mdzad pa'i 'grel pa mthong nas legs ldan 'byed kyi legs bshad gang / /gcig nas gcig tu brgyud las 'ong dang bdag gis rnam par phye las rnyed pa gang / /de dag bsdams te blo chen ldan rnams mgu bar bya phyir yang dag bstan pa yin/ /zhes gsungs pas so/ /dbu ma'i brgyud lugs rang rgyud pa/ thub pa 'jam dbyangs/ sgra gcan 'dzin/ klu sgrub/ sangs rgyas bskyangs/ de wa sharma/ legs ldan 'byed/ spyan ras gzigs b.ratal zhugs/ sangs rgyas ye shes/ ye shes snying po/