[A:31a]sbed byed/ ngos yangs kyi ri la klu'i sde/ lo ma bdun pa'i ri la nags gnas/ bya rgod phung po la lam phran/ kha cher gser be'u/ ti se la yan lag 'byung / drang srong shel nags la ma pham pa ste re re'ang dgra bcom pa mang pos bskor te bzhugs la/ rgya nag tu thang tha'e tsung gi dus dang / se chen dang / gong ma ye dbang gi dus mi kun gyi mngon sum du byon zer/ gzhan phal gyis mi mthong 'ja' lus pa lta bu'o/ /dga' ba'i bzhin gyi rtogs brjod las/ gnas brtan chen po de dag gang du dkon mchog gsum gyi gtsug lag khang gsar du byed pa der sprul pa'i skus byon nas byin gyis rlob par yang mdzad la/ mthar tshe lo yar 'phel ba'i mi rnams kyi lo drug brgya thub pa na de dag yul dbus su 'dus te sku gdung rnams la mchod pa mdzad de lhag ma med pa'i dbyings su mya ngan las 'da'o zhes gsungs/ de ltar ston pa bzhugs dus 'dzam bu'i gling gi grong khyer chen po bcu drug tu ni bstan pa legs par dar la/ kha cher de'i tshe grong khyer med pas ston pa 'das nas lo brgya na nyi ma gung pas bsam gtan dang mthun pa'i gnas mal gyi mchog kha cher bstan pa 'jog go zhes lung bstan pa bzhin/ kun dga' bo mya ngan las 'das nas lo nyi shur nye ba na/ dgra bcom pa nyi ma gung pas lung bstan pa'i dus la bab par shes nas kha cher song ste/ de mtshor yod pa'i lung pa dgu'i mdor skyil mo krung gcig gis mnan pas/ klu 'khrugs te sa g.yos rdzi char drag po phab kyang chos gos kyi mtha' yang ma g.yos/ mda' mtshon gyi char phab pa me tog tu bsgyur bas/ klu rnams ngo mtshar nas bka' ci stsol zer ba dang / nga ston pas lung bstan pas gnas 'dir 'ongs kyi nga la 'di byin cig skyil mo krung gis gang non pa de phul lo/ /'khor ci tsam mnga'/ 'khor dgra bcom pa lnga brgya'o/ /de la gcig ma tshang na'ang 'phrog go zer ba dang / gnas brtan gyis sbyin bdag gnas sa len pa yod pas khyim bdag kyang gzhug par bya'o zhes bgros nas/ der sgyu ma mkhan sgyu ma'i grong khyer byed du bcug nas phun sum tshogs la mi 'jig par byin gyis brlabs/ der skye bo'i tshogs bcug cing ri spos ngad ldan las gur gum blangs te bstan pa ji srid gnas kyi bar du skye bar byin gyis brlabs te/ grong khyer gcig la'ang mi khyim 'bum phrag sum cu so drug tsam da lta'i bar du yod zer/ gzhan grong khyer du ma yod pa yul shin tu nyams dga' ba'o// //