[A:280a]rgya gsum gyi gdan 'dren byung / paNDYi ta bi bhu ti tsandra spyir phyag rgya chen po ba la skyon/ khyad par de dus phyag rgya ba 'di rdzun che ba yin/ 'o skol bka' gdams pa gdan 'dren sar byon pa 'thad zhu ba la/ paN chen thugs hur phyung ste/ bi bhU ti bi bhU ti/ de skad ma zer sangs rgyas la 'khrul pa mi mnga'/ 'bri gung pa slob dpon klu sgrub yin zhes sngar gyi lo rgyus gsungs/ lhag par khyod phyag rgya ba la skur pa btab pas dmyal bar skye bar 'dug sdig pa sbyongs gsungs/ 'o na ji ltar sbyangs zhus pas/ 'dir bde mchog gi sku zhig bzhengs gsungs pas bzheng par gsan/ kha che ba yin zer ba'i bzo ba zhig byung / des zhag bdun la bsgrubs nas de nyid la thim pa dpal he ru ka nyid kyi sprul pa yin zhes grags so/ /'bri gung pas tsa ri'i dag pa shel gyi ri sgo mang mchod rten gyi dbyibs lha nyis stong brgyad brgya'i pho brang du gzigs nas bal po'i bzo bo mkhas pa bkug ste sgo mang rin po che las bzhengs bdun cu rtsa lnga pa la gshegs/ slob ma grub pa brnyes pa bgrang gis mi lang / gtso bo rje spyan snga/ dbon rin po che mched/ gnyos mgar chos gsum/ dbon sher 'byung sogs so/ /rje spyan snga ba ni slob dpon padma'i dngos slob a mi byang chub 'dre bkol du grags pa'i gdung rabs/ rlangs lha gzigs/ yab yon chen rgyal bskyabs kyi sras su bltams/ bcu gsum pa la spyi gnas g.yo bu zhes bya bar rab tu byung / mtshan grags pa 'byung gnas su gsol/ dgung lo bco lnga pa la bros nas 'bri gung du byon/ chos rje dang mjal/ der phyag dbu la bzhag pa tsam gyis chos thams cad mnyam pa nyid ces bya ba'i ting nge 'dzin 'khrungs/ lo ngo gsum gzims spyil zur pa zhig tu de bskyangs/ bcu bdun pa la chos rje dwags por 'byon pa'i phyag phyi gzims g.yog mdzad/ de man spyan snga kho nar bzhugs pas spyan snga bar thogs/ bco brgyad pa la zheng sum thog pas mkhan po/ lha 'bri sgang pas las slob byas te bsnyen par rdzogs/ chos rje'i gdam ngag thams cad tshang bar gsan/ chos rjes tshogs su byon pa'i na bza' bsnams pa'i mod la khri thog tu bton/ chos rje nyid kyis phyag phul te/ ngas gdan sa brgya 'gyur stong 'gyur du bzang du btang gi gsungs nas rje spyan snga phag mo grur brdzangs te/ ngam bus tshogs pa 'di tsam bskyangs pa'i phud rje phag mo gru pa la phul ba yin gsungs/