[A:23a]lnga sde la chos gos zlum por bgo bar bya'o/ /bslab gzhi gsum pa gang du bcas/ ka rnam gzhag ka'i grong du bzang sbyin la mi tshangs spyod pham par bcas pa nas/ pham pa dang / lhag ma dang / ma nges pa dang / spang ltung dang / ltung byed dang / sor bshags dang / bslab pa mang po dang / rtsod pa zhi byed dang / rjes bcas dang / spang gnad dang / rab byung dang / gso sbyong dang / dgag dbye dang / phra mo dang / gleng gzhi dang / mos pa ni 'di'o/ /zhes 'dul ba bsdus nas nye bar 'khor khri las babs so/ /de nas 'od srung gis ma mo zhes bya ba ni bdag kho nas bsdu bar bya ste gsol gnyis kyi las byas nas/ ma mo lta bu ni shes bya'i mtshan nyid rab tu gsal bar byed pa ste/ 'di lta ste dran pa nye bar bzhag pa bzhi dang zhes sogs sngar bzhin no/ /de nas lha rnams kyis dgra bcom pa lnga brgyas sde snod gsum bsdus te lha 'phel/ lha ma yin 'gribs so zhes bsgrags shing / lnga brgyas yang dag par bsdus pa zhes pa'i ming du gyur to/ /de nas 'od srung chen pos/ kye ma stobs bcu mnga' ba'i gsung ni tshad med pa/ /'gro la phan phyir chos kyi bstan 'chos 'di bsdus pas/ /gang na 'jig rten blo ngan mun byed chud zos pa/ /blo gros rab rib gsal bas sgron mar yang dag ldan/ /zhes sbyar ro/ /theg chen ni rgyal po'i khab kyi bi ma la swa bhA wa zhes pa'i ri la rgyal sras 'bum phrag bcu 'dus te kun tu bzang po dang / 'jam dpal dang / gsang ba'i bdag po dang / byams pa la sogs pa rnams kyis bsdus so/ /sngags rnams ni gtso bor phyag na rdo rjes bsdus pa yin no/ /de la bsdu ba dang po zhes grags te bka' 'thor ba bsdus pa ni 'di kho na yin no/ /ston pa 'das nas lo brgya dang bcu lon pa na yangs pa can pa'i dge slong rnams kyis rung ba ma yin pa'i gzhi bcu ste/ a la la dang rjes su yi rang spyod pa dang / rtags pa dang ni lanydza dag dang lam dang ni/ /sor mo gnyis kyis rung dang dkrugs dang gding ba dang / /gser dngul byas pa 'di ni bar sdom yang dag bsdus/ /zhes pa'o/ /de gnas brtan grags pas thams cad 'dod la sogs pa kun dga' bo'i slob ma dgra bcom pa bdun brgya bsdus nas/ rgan rim du grags pas/ tshe dang ldan pa dag a la la'i rung ngam zhes sogs kyis dge slong kha cig ces ming ma phyung bar bzlas te/ rab tu spyos te de bdag cag gis dor bar bya'o zhes gzhi rgyas par brjod de phyir phyung nas/ gaNDYI brdungs