[A:222a]phu klog skya chen po gshegs/ de'i sras po shes rab brtsegs kyis zhabs nas bteg thog mar mahA ma yA'i chos btsugs/ rim gyis yul du byon/ lho la yag gi ba rang lba ba can sogs 'dus/ dpe med kyang gdam ngag rnams thugs la byang bar bzhugs pas 'chad nyan smar bar byung / de nas slar byang nam ra'i gser kha rdol ba dang thugs gser mang du rnyed nas rgya gar du byon/ bla ma rnams la btang rag gi maNDYal tshogs dang mchod pas mnyes par byas te/ sngar ma gsan pa rnams gsan pa dang gsan pa rnams kyi dpe bod na 'gyur grub pa rnams gzhi de khar bzhag nas/ bcos dgos pa rnams bla ma rnams la zhus te gtan la phab/ 'ga' zhig ma bsgyur bar rgya dpe rang bsnams/ jo bo nA ro pa la de res bde mchog rang lugs kyi tshogs bshad tsam/ lo dril nag po'i skor/ 'dus pa ye shes zhabs lugs sogs gsan/ mai tri pa la dgyes rdor sangs rgyas thod pa gsan nas/ bod du 'byon khar rje btsun nA ro pas phyag dbu thog tu bzhag nas/ nam mkha'i me tog skyes bu yis/ /mo sham bu yi rta zhon nas/ /rus sbal spu yi thun brabs te/ /ri bong rwa yi phur pa yis/ /dgra bo chos nyid klong du bsad/ /lkugs pas smra zhing dmus long lta/ /'on pas nyan zhing zha bos rgyug /nyi zla gar mkhan dung 'bud cing / /'khor lo bu chung skor bar byed/ /lan gcig cis kyang shog cig gsungs/ /'byon pa'i dam bca' phul/ de nas bod du phebs mes rngog mtshur dbang de la sogs pa rjes su bzung / slar 'phan yul nas byang 'dam gyi bar byon/ snying drung du mar pa mgo yags kyis gser srang bzhi bcus yol go chen po zhig bkang ste phul ba sogs gser gtos che ba rnyed/ der tho rangs mnal lam na dar gyi gos gyon/ rus pa'i rgyan btags pa'i bu mo gsum bsgrigs nas/ mkha' 'gro nam mkha'i me tog gis/ /snyan rgyud mo sham rta zhon nas/ /brjod med rus sbal spus brabs te/ /skye med ri bong rwa phur bus/ /te lo chos nyid klong du bsad/ /te lo lkugs pa smra bsam brjod med kyis/ /nA ro 'on pa chos nyid chos sku'i ri bo la/ /blo gros zha bo 'gro 'ong med par rgyug /nyi zla dgyes pa rdo rje ste/ /gar mkhan du ma ro gcig yin/ /dung ni snyan pa phyogs bcur grags/ /'bud pa snod ldan dag