[A:21a]bgro bar 'tshal lo zhes smras pas legs kyi/ bdag gis yo byad thams cad sbyar ro/ /de na 'dus te nya gro dha'i phug tu rgyal pos yo byad thams cad sbyar nas dbyar gnas par khas blangs nas/ 'od srung chen pos kun dga' bo spyo bas 'dul bar shes nas nyes pa bsgrags te bskrad do/ /des bri dzi'i grong du song nas bri dzi'i bus g.yog byas te chos 'chad pa'i tshe/ des mkhan po'i sems la brtags nas/ go'u ta ma bag med ma mdzad par/ /shing drung thibs po bsten na mya ngan 'da'/ /thugs la bzhag ste bsam gtan mdzod cig dang / /ring por mi thogs zhi ba'i gnas thob 'gyur/ /de ltar spong byed bu yi gdam ngag las/ /nyin mo dang mtshan mo'i thun dang po la 'chag pa dang 'dug pas sems kyi sgrib pa sbyangs te/ gung thun la gtsug lag khang gi phyi rol tu rkang pa bkrus nas nang du glo g.yas pa phab ste sngas la mgo ma bzhag pa kho nar dgra bcom ste/ slar nya gro dha'i phug tu phyin no/ /de nas 'od srung gis phyi ma'i dus kyi dge slong brjed ngas pa rnams kyi don du/ snga dro tshigs bcad dang / phyi dro lhag par bgro zhing / de yang sngar mdo sde bsdu bar bgros pa dang / 'od srung gis kun dga' bo la spro ba dris/ gsol gnyis kyi las kyis mdo sde bsdu bar bskos nas/ sengge'i khri dgra bcom pa bzhi brgya go dgus snam sbyar bting / de la kun dga' bo 'dug ste/ 'od srung gis/ ston pa 'jig rten phan bzhed pa/ /rgyal bas gsungs pa'i chos rnams kyi/ /rnam pa mchog ni gang bshad pa/ /tshe dang ldan pas mdo sde gsungs/ /zhes gsol ba btab bo/ /de nas kun dga' bos/ ston pa'i yon tan dran pas kha byang chub snying por bltas thal mo sbyar te sgras khyab par chos yang dag par sdud pa'i man ngag bzhin du/ 'di skad bdag gis thos pa dus gcig na/ bcom ldan 'das yul wA rA Na sI drang srong lhung ba ri dwags kyi nags na bzhugs so/ /de nas bcom ldan 'das kyis dge slong lnga po la 'di skad ces bka' stsal te/ dge slong dag ma thos pa'i chos 'di ni sdug bsngal 'phags pa'i bden pa'o zhes sogs bsdus pa na/ kun shes ko'u di nyas/ bdag cag gis chos kyi rnam grangs 'di mngon sum du thos te/ bdag gi khrag dang mchi ma'i rgya mtsho bskams/ rus pa'i ri las brgal/ ngan song gi sgo ni bcad/ mtho ris thar pa'i sgo ni phye ste/ 'di bshad