[A:209a]thos pa mdzad/ bod phrug gcig la thos pa che ba yin/ khro phu ba'i mdo'i 'chad nyan kyang der 'phos/ ding sang mdo rgyud sgra rig kun la lab lab byas chog pa 'di khong gi bka' drin no/ /de la slob ma bsam gyis mi khyab pa byon pa las mchog gyur thugs sras lo tsA ba dpal ldan bla ma dam pa/ gong gsum pa dharma shrI sogs las dus kyi 'khor lo mched de/ 'di khro phu ba'i khongs su gtogs la/ 'on kyang 'phrin las che bas bod rnams zha lu ba zhes lugs chen po logs pa zhig tu 'dren no/ /yang 'jam dbyangs gsar ma'i slob ma kun mkhyen chos sku 'od zer/ de'i slob ma kun spangs thugs rje brtson 'grus/ 'dis jo nang btab/ de'i slob ma byang sems rgyal ba ye shes/ de la 'phags 'od yon tan rgya mtsho dang mkhas btsun yon tan rgya mtsho gnyis byon pa'i dang pos bu ston/ gnyis pas jo nang pa'i bla ma mdzad/ de'i slob ma dol po ba ste mnga' ris smad dol po'i ban tshang zhes par sku 'khrungs/ gzhon nu la skyi ston 'jam dbyangs grags pa la gtugs nas ka chen bzhi dang / dus 'khor rwa lugs la thos pa mdzad/ khong rong pa shes rab sengga'i slob ma yin/ sa skyar sku gzhon nu la bka' bzhi'i bshad pa mdzad/ dbus gtsang du grwa skor mdzad pas ston pa bzang bar grags/ des bu ston ri phug na bzhugs dus rtsod du byon pas/ bu ston gyis ma nus/ thal skad bton pas gzims khang gas zer ba'i gtam khungs gzhan na mi 'dug jo nang pa'i sgom ma rnams kyi nyams las so snyam mo/ /gzhan yang bla ma mang po la gsan pa mdzad/ khyad par jo nang du mkhas btsun yon tan rgya mtsho la dus 'khor rgyud 'grel man ngag dang bcas pa gsan/ man ngag sku nyams su bzhes pas/ dpe med pa'i myong ba 'khrungs/ jo nang gi gdan sa gzung / sku 'bum mthong grol chen mo bzhengs/ gzhan stong ston pa'i bstan bcos mang du mdzad/ 'chad nyan gyis bstan pa la phan thogs rgya chen po byung ba'i slob ma kun spangs chos grags dpal bzang sogs thun mong ma yin pa dang / bu dol gnyis thun mong ba ma ti rnam gnyis dang / mnga' ris pa phyogs las rnam rgyal/ nya dbon kun dga' dpal de gsum phyis jo nang pa shas che/ de dag sogs mkhas shing yan lag drug gi rnal 'byor lhur len pa mang pos dbus gtsang mnga' ris khams khyab par mdzad do/ /dus kyi 'khor