[A:187a]legs par bskyangs so/ /mthar jo bos 'brom la khyod kyi gnas gzhi chung ngu zhig brtsigs/ nga'i bstan pa khyod la gtod pas zung gsung / de la 'brom gyis/ spyir bdag 'khos ka chung bye brag tu rten dge bsnyen du song nas bya ba chen po sgrub mi nus zhus pas/ jo bos bslabs pa bzhin du gyis/ nga rang gis byin gyis rlob pas sems khral mi dgos gsung / 'brom la rgyal tshab bkod/ dgung lo bdun cu rtsa gsum la dga' ldan du gshegs/ sku gdung zhugs la phul ba'i dus gser gyi char bab/ jo bos bod du lo bcu gsum bstan pa bskyangs so/ /'brom gyis shul 'dir ji ltar bya snyam thugs las che ba la/ ka ba shAkya dbang phyug de ma thag tu byon nas gdung rnams bzhu/ rngog la sogs pa bu chen rnams la 'tsham par bkye/ rten dang thugs dam gyi lha rnams 'brom la gtad/ khu rngog 'gar dge rnams kyis gdung la dngul gyi gdung khang legs pa re'ang grub/ ka bas do dam mdzad nas 'dad dang shul du gtsug lag khang brtsigs/ 'brom gyis jo bos skyong ba'i tshogs pa rnams phyag phyir khrid de stod lung du byon nas gnam gyi bye ma lung du thog cig bzhugs/ de'i tshe 'dam pa'i gtso bo rnams kyis kyang gros byas/ 'brom ra sbreng du spyan 'dren par thag bcad/ 'phrang kha ber chung gis kyang zhu bas slebs nas me pho spre'u lo gsar la ra sbreng du phebs gnas gzhi btab/ de rting nga 'jig rten blos gtong gsungs nas chos gsung ba ma gtogs 'jig rten gyi 'dun ma mi mdzad/ dgung lo drug cu pa la mya ngan las 'das/ 'di ni snying rje padma dkar po'i mdo las dge bsnyen chos 'phel zhes lung bstan pa de yin par kun bden/ 'tshims pas 'phags pa'i gnas brtan bcu drug gi nye gnas dharma ta/ de dag gi gdugs tshod la bab pa na snang ba mtha' yas mdun gyi nam mkhar byon nas bskul ba'i dge bsnyen ni 'phags pa spyan ras gzigs te 'brom/ 'od dpag med jo bo yin no gsung / de ltar jo bo la bod rang du'ang slob ma bsam gyis mi khyab pa byung ba'i sras kyi dam pa 'brom yin no/ /de la'ang slob ma mang yang / phu chung ba dang / spo to ba/ spyan snga ba gsum la sku mched gsum zhes grags te/ phu chung bas tshogs pa ma bskyangs/ /spo to ba la rgyun du tshogs pa stong lhag pa re rjes su 'brang / gzhan gyis gnod na'ang spyir dge